ءماجىلىس دەپۋتاتى ەلنۇر بەيسەنباەۆ ۇكىمەت ساعاتىندا مەملەكەتتىك تىلدە قويىلعان ساۋالعا ورىسشا جاۋاپ بەرگەن ۇلتتىق ەكونوميكا ۆيتسە-ءمينيسترى تيمۋر جاقسىلىقوۆتى سىنادى.

«ەگەر مەنىڭ سۇراعىما سىزگە جانە اۋىل شارۋاشىلىعى مينيسترلىگىنە، شەكارا قىزمەتىنىڭ ءبىرىنشى ورىنباسارىنا قويىلعانداي قازاق تىلىندەگى سۇراققا ورىس تىلىندە جاۋاپ بەرەتىن بولساڭىز، وندا جاۋاپ قايتارماي-اق، قويساڭىز بولادى. وزگە ۆيتسە-مينيستردەن قاعاز تۇرىندەگى جاۋاپتى ءوزىم الىپ الامىن. مەملەكەتتىك قىزمەتكەردىڭ مەملەكەتتىك تىلدە قويىلعان قازاقشا سۇارعىنا وزگە تىلدە – ورىس تىلىندە جاۋاپ بەرۋدى «نونسەنس» دەپ سانايمىن»، - دەدى دەپۋتات.

ەلنۇر بەيسەنباەۆتىڭ سۇراعىنا جاۋاپ بەرمەك بولعان تيمۋر جاقسىلىقوۆ قازاق تىلىندە قويىلعان سۇراقتى تۇسىنبەي «ديپلوممەن اۋىلعا» باعدارلاماسى تۋرالى ايتا باستادى. سودان سوڭ دەپۋتات مينيسترلىك وكىلىنە بىلاي دەپ سۇراق قويدى:

«قۇرمەتتى ۆيتسە-مينيستر مىرزا، مەن سىزدەن «ديپلوممەن اۋىلعا» باعدارلاماسىنىڭ قالاي ىسكە اسقانىن سۇراعان جوقپىن. مەن سىزدەن: «قانشا بالىقشىنى دايارلادىڭىزدار؟ قانشا بالىقشى ديپلوم الىپ، اۋىلعا باردى؟ قانشا بالىقشى ءۇي جانە الەۋمەتتىك قولداۋ الدى؟ 2009-دان بەرى 13 جىلدا قانشا بالىقشىعا قولداۋ كورسەتتىڭىز؟» - دەپ سۇرادىم. ال «ديپلوممەن اۋىلعا» باعدارلاماسىن ءبىز سىزدەن ارتىق بىلەمىز. قانشا قاراجات ءبولىنىپ، قالاي ىسكە اسىپ جاتقانىن. قانشا بالىقشى باردى، سونىمەن؟ سىزدە ەسەبى بار ما؟».

«كەشىرىڭىز قازىرگى تاڭدا مەندە تولىق اقپارات جوق، وسى سۇراققا جازباشا تۇردە جاۋاپ بەرۋگە رۇقسات ەتىڭىزدەر»، - دەدى ۇلتتىق ەكونوميكا ۆيتسە-ءمينيسترى.

بۇل قازاق شەندىسىنىڭ قازاقشا قويىلعان سۇراققا وزگە ەلدىڭ مەملەكەتتىك تىلىندە جاۋاپ بەرىپ تۇرعان العاشقى وقيعاسى ەمەس. سوندا بۇل قازاقشا تۇسىنبەيتىن مينيسترلىك وكىلدەرى قاي ەلدىڭ ازاماتتارى؟

Abai.kz