بۇگىن «AMANAT» پارتياسىنىڭ ورتالىق اپپاراتىندا «جەر اماناتى» كوميسسياسىنىڭ كەڭەيتىلگەن وتىرىسى ءوتتى. ونىڭ بارىسىندا اتقارىلعان جۇمىستىڭ ارالىق قورىتىندىسى شىعارىلىپ، الداعى مىندەتتەر ايقىندالدى.

ءىس-شاراعا ماجىلىستەگى «AMANAT» پارتياسى فراكتسياسىنىڭ دەپۋتاتتارى، باس پروكۋراتۋرانىڭ، اۋىل شارۋاشىلىعى مينيسترلىگىنىڭ باسشىلىعى، قوعام قايراتكەرلەرى، پارتيانىڭ وڭىرلىك فيليالدارىنىڭ اتقارۋشى حاتشىلارى جانە تاعى باسقالار قاتىستى.

وتىرىستى اشقان پارتيا توراعاسى ەرلان قوشانوۆ جايىلىمدىق جەر ماسەلەسى مەملەكەت باسشىسى قاسىم-جومارت توقاەۆتىڭ جەكە باقىلاۋىندا ەكەنىن اتاپ ءوتتى.

«بىلتىر پرەزيدەنت يگەرىلمەي جاتقان جەرلەردى مەملەكەتكە قايتارىپ الۋ تۋرالى ۇكىمەت پەن باس پروكۋراتۋراعا ارنايى تاپسىرما بەرگەن بولاتىن. بۇل جۇمىسقا «AMANAT» پارتياسىنىڭ جانىنان قۇرىلعان وسى ءبىزدىڭ «جەر اماناتى» كوميسسياسى دا بەلسەندى ات سالىسىپ كەلەدى. ماسەلەن، بۇگىندە ەلىمىز بويىنشا 5 ميلليون گەكتار جەر مەملەكەت مەنشىگىنە قايتارىلسا، ونىڭ ناقتى 3 ميلليون گەكتارى «جەر اماناتى» كوميسسياسىنىڭ تىكەلەي ارالاسۋىمەن ىسكە استى»، - دەدى ەرلان قوشانوۆ.

ول از ۋاقىت ىشىندە كوميسسيانىڭ «جەدەل جەلىسىنە» تۇرعىنداردان 2,5 مىڭنان استام ءوتىنىش كەلىپ تۇسكەنىن اتاپ ءوتتى. ونىڭ بارلىعى جەرگىلىكتى اكىمدىكتەرمەن جانە بەيىندى مينيسترلىكپەن بىرلەسىپ مۇقيات قارالدى.

سونداي-اق، پارتيا توراعاسى الداعى ۋاقىتتا اتقارىلاتىن جۇمىستاردىڭ نەگىزگى مىندەتتەرىن اتاپ ءوتتى. ماسەلەن، وڭىرلىك كوميسسيالار مەملەكەتكە قايتارىلعان اۋىل شارۋاشىلىعى جەرلەرىنىڭ حالىق اراسىندا ءادىل بولىنۋىنە قاتاڭ باقىلاۋ جاساۋى قاجەت. سونداي-اق، جەردى زاڭسىز بولگەن لاۋازىمدى تۇلعالاردى جاۋاپكەرشىلىككە تارتۋ جانە بولاشاقتا وسىنداي فاكتىلەرگە جول بەرمەۋ ءۇشىن ءتيىستى شارالار قابىلداۋ كەرەك.

«جەر اماناتى» كوميسسياسىنىڭ مۇشەلەرى ءاربىر اۋىلدىق ەلدى مەكەندەگى جايىلىم تاپشىلىعى مەن مەملەكەت مەنشىگىنە قايتارىلعان جەر ۋچاسكەلەرىنىڭ تىزبەسىن كورسەتەتىن ينتەراكتيۆتى كارتا ازىرلەۋدى ۇسىندى.

سونداي-اق، وتىرىس بارىسىندا اۋىل شارۋاشىلىعى ءمينيسترى ەربول قاراشوكەەۆ، باس پروكۋروردىڭ ورىنباسارى اسەت شىنداليەۆ، زاڭگەر باقىتجان بازاربەك، قوعام قايراتكەرلەرى مۇرات ابەنوۆ، عالىم بايتوق، جۋرناليست ماقسات تولىقباي، پارتيا فيليالدارىنىڭ اتقارۋشى حاتشىلارى جانە تاعى باسقالار ءسوز سويلەدى.