پرەزيدەنت قاسىم-جومارت توقاەۆ استاناعا رەسمي ساپارمەن كەلگەن گرەكيانىڭ سىرتقى ىستەر ءمينيسترى نيكولاوس دەندياستى قابىلدادى، دەپ حابارلايدى اقوردا.

كەزدەسۋ بارىسىندا ساۋدا-ەكونوميكالىق بايلانىستاردى نىعايتۋعا باسا ءمان بەرىلىپ، قازاقستان مەن گرەكيا اراسىنداعى ىنتىماقتاستىقتى دامىتۋ پەرسپەكتيۆالارى تالقىلاندى. مەملەكەت باسشىسى گرەكيانىڭ ەۋروپالىق وداققا مۇشە مەملەكەتتەر اراسىندا ماڭىزدى سەرىكتەس ەلدەردىڭ ءبىرى ەكەنىن اتاپ ءوتتى. سونداي-اق ەكى ەل كوپجاقتى الاڭداردا ءوزارا تىعىز قارىم-قاتىناس جاساپ كەلە جاتقانىن جەتكىزدى.

«گرەكيامەن اراداعى بايلانىستار ءبىز ءۇشىن باسىمدىق سانالاتىنىن تاعى دا اتاپ وتكىم كەلەدى. ءبىز ءوزارا ىنتىماقتاستىق كورسەتكىشتەرىن جاڭا دەڭگەيگە كوتەرۋ ءۇشىن قولدان كەلگەننىڭ ءبارىن جاسايمىز»، – دەدى پرەزيدەنت.

ءوز كەزەگىندە نيكولاوس دەندياس ەكىجاقتى جانە كوپجاقتى ىنتىماقتاستىق ماسەلەلەرى جونىندە پىكىر الماسۋعا مۇمكىندىك بەرگەنى ءۇشىن قاسىم-جومارت توقاەۆقا العىس ايتتى.

«ءبىز قازاقستاندى وڭىردەگى تۇراقتىلىققا كەپىل بولاتىن ورتالىق ازياداعى ەڭ ءىرى جانە باسىمدىققا يە ەل رەتىندە قاراستىراتىنىمىزدى اتاپ وتكىم كەلەدى. گرەكيا ءسىزدىڭ ەلىڭىزبەن ءوزارا ءتيىمدى ىنتىماقتاستىقتى ودان ءارى نىعايتۋعا دايىن»، – دەدى مينيستر.

سونىمەن قاتار ولار اڭگىمەلەسۋ بارىسىندا حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.

Abai.kz