ءماجىلىس توراعاسى ەرلان قوشانوۆ باستاعان قازاقستاننىڭ پارلامەنتتىك دەلەگاتسياسى ۇجىمدىق قاۋىپسىزدىك شارتى ۇيىمى پارلامەنتتىك اسسامبلەياسىنىڭ كەزەكتى وتىرىسىنا قاتىسۋ ءۇشىن ماسكەۋگە جۇمىس ساپارىمەن باردى.

كەڭەستىڭ بىرلەسكەن وتىرىسىنا جانە ۇقشۇ پا XV پلەنارلىق وتىرىسىنا قاتىسۋشىلار ارمەنيا رەسپۋبليكاسىنىڭ 2021-2022 جىلدارداعى ۇيىمعا توراعالىعىنىڭ قورىتىندىلارى مەن بەلارۋس رەسپۋبليكاسىنىڭ الداعى توراعالىعى كەزىندەگى باسىمدىقتارى تۋرالى اقپاراتتى تىڭدادى.

ءماجىلىس سپيكەرى ءوز سوزىندە وڭىردە تۇراقتىلىق پەن قاۋىپسىزدىككە نۇقسان كەلتىرەتىن ءتۇرلى قاۋىپ-قاتەرلەر مەن قاقتىعىستاردىڭ وزەكتى بولىپ وتىرعانىنا نازار اۋداردى. مۇنداي جاعدايلاردا اشىق ديالوگتىڭ ماڭىزدىلىعىن قازاقستان پرەزيدەنتى تالاي مارتە اتاپ وتكەن بولاتىن. ە.قوشانوۆتىڭ ايتۋىنشا، وسى تۇستا ۇقشۇ ەلدەرى پارلامەنتتەرىنە ۇلكەن جاۋاپكەرشىلىك جۇكتەلىپ وتىر.

وتىرىس بارىسىندا ءماجىلىس توراعاسى ۇيىمعا مۇشە ەلدەردىڭ تەرروريزممەن كۇرەس سالاسىنداعى ۇلتتىق زاڭنامالارىن ۇيلەستىرۋگە مۇمكىندىك بەرەتىن ۇجىمدىق قاۋىپسىزدىك شارتى ۇيىمىنىڭ «تەرروريزمگە قارسى ءىس-قيمىل تۋرالى» جاڭا مودەلدىك زاڭىن ازىرلەۋدى ۇسىندى.

– تەرروريزم قاۋىپسىزدىك پەن تۇراقتىلىققا ۇلكەن قاۋىپ توندىرەدى. ول زاڭسىز كوشى-قوننىڭ، ترانسشەكارالىق قىلمىستىڭ، زاڭسىز قارۋ-جاراق پەن ەسىرتكى تاسىمالىنىڭ ارتۋىنا ىقپال ەتەدى. بىزگە وسى سىن-قاتەرلەرگە بىرلەسىپ قارسى تۇرۋدىڭ ناقتى قۇقىقتىق تەتىكتەرىن قالىپتاستىراتىن ۇقشۇ ەلدەرىنىڭ مودەلدىك زاڭناماسىنىڭ ساپالى بازاسىن قامتاماسىز ەتۋ كەرەك، – دەدى ە.قوشانوۆ.

وتىرىستا ۇيىمعا مۇشە مەملەكەتتەردىڭ ۇلتتىق زاڭناماسىن جاقىنداستىرۋ جانە ۇيلەستىرۋ بويىنشا ۇقشۇ پا-نىڭ قولدانىستاعى ءىس-شارالار باعدارلاماسىن ىسكە اسىرۋ اياسىندا بىرقاتار مودەلدىك قۇقىقتىق اكتى قابىلداندى.

سونىڭ ىشىندە وتىن-ەنەرگەتيكالىق كەشەن وبەكتىلەرىندە تەرروريزمگە قارسى ءىس-قيمىل، حالىقارالىق تەرروريزمنىڭ ۇقشۇ ەلدەرىنە ەنۋى مۇمكىن ارنالارعا توسقاۋىل قويۋ، ۇقشۇ مودەلدىك اكتىلەرىن قابىلداۋ ءۇشىن ازىرلەۋدىڭ جانە دايىنداۋدىڭ ادىستەمەلىك نەگىزدەرىن جەتىلدىرۋ بويىنشا ۇسىنىمدار بار.

سونىمەن قاتار وتىرىستىڭ كۇن تارتىبىندەگى ماسەلەلەردىڭ ءبىرى  بيىلعى 20 قاراشادا وتكەن قازاقستانداعى پرەزيدەنتتىك سايلاۋدى باقىلاۋعا قاتىسقان ۇقشۇ پارلامەنتتىك اسسامبلەياسى مونيتورينگتىك توبىنىڭ قورىتىندىلارى تۋرالى بولدى. ۇقشۇ پا ميسسياسىنىڭ قورىتىندىسىنا سايكەس، سايلاۋ حالىقارالىق نورمالار مەن ۇلتتىق زاڭناماعا تولىعىمەن سايكەس ءوتتى.

ايتا كەتۋ كەرەك، ۇقشۇ پا قۇرامىنا ارمەنيا، بەلارۋس، قازاقستان، قىرعىزستان، رەسەي جانە تاجىكستان پارلامەنتتەرىنىڭ وكىلدەرى كىرەدى. وندا الەۋمەتتىك-ەكونوميكالىق جانە قۇقىقتىق ماسەلەلەر، ساياسي ماسەلەلەر جانە حالىقارالىق ىنتىماقتاستىق، قورعانىس جانە قاۋىپسىزدىك ماسەلەلەرى بويىنشا ءۇش تۇراقتى كوميسسيا جۇمىس ىستەيدى.

Abai.kz