ورىستىڭ باسىنا بۇلت ءۇيىرىلىپ كەلەدى. ناتو رەسەيدىڭ ازىرەيىلىنە اينالدى. جانى شىعىپ بارا جاتقان رەسەي قاتتى تۇياق سەرپىپ قالماۋ ءۇشىن ۋكراينا ارقىلى ونى «تۇنشىقتىرىپ» ولتىرمەكشى.

ۋكراينا دالاسىندا قالعان 92740 ءمايىتتىڭ (سوعىس بىتكەنشە ولاردىڭ سانى 200000-عا جەتەدى دەيدى) ارتىندا بالالارىن جوقتاعان انالار، بايى ولگەن جەسىرلەر، اكەسىنەن ايىرىلعان جەتىمدەر قالدى. ورمانداي ورىس «موگيليزاتسيادان» قاشىپ، الەمگە ءشىلدىڭ بوعىنداي شاشىراپ كەتتى. ءبىزدىڭ ەلىمىزدى دە پانا تۇتىپ جاتقاندارى قانشاما. قازاقستاننان باسقا ەلدەرگە بارعان ورىستار سول ەلدىڭ ءتىلىن ۇيرەنۋگە كىرىسىپتى. ول جاقتا «رۋسسكي مير» جوق. ناتو-نىڭ قارۋىنان قورقىپ، مەكسيكا ارقىلى اقش-قا بارىپ جاتقان ورىستاردىڭ سانى دا از ەمەس ەكەن. ولار ەندى جاقىن ارادا قايتىپ ورالمايدى: «پروششاي، نەمىتايا روسسيا، سترانا رابوۆ، سترانا گوسپود...» كۇنكورىسىن ويلاپ، ورىسپىن دەپ ايتۋعا نامىستانعان بۇل توبىر اياعى ىلىنگەن ەلگە بىرتە-بىرتە ءسىڭىپ جوق بولادى.

جاقىندا قازاقستان-بريتان تەحنيكالىق ۋنيۆەرسيتەتىنىڭ 2-كۋرسىندا وقيتىن نەمەرەم نيدەرلاندى، انگليا، فرانتسيا، يسپانيا، تۇركيا ەلدەرىندە تاجىريبەدەن ءوتىپ كەلدى. تاجىريبەدەن وتۋگە بارعان 28 ستۋدەنتتىڭ اراسىندا جالعىز ورىس جىگىتى بار ەكەن. بايعۇس ەۋروپادا «گادكي ۋتەنوك» بولدى دەيدى نەمەرەم. ءار جەردە وعان ەۋروپالىقتار «ورىسسىڭ با؟»، «رەسەيدەنسىڭ بە؟» دەپ سۇراق قويىپ، ءبىرتۇرلى قارايتىن كورىنەدى. وسىنداي سۇراق قويعانداردىڭ بارىنە ول اعىلشىنشا «مەن قازاقپىن»، «قازاقستاننانمىن» دەپ جاۋاپ قايتارىپ ءجۇرىپتى. ورىستار ەندى ورىسپىن دەپ ايتۋعا دا نامىستاناتىن بولادى...

بايبوتا قوشىم-نوعاي

Abai.kz