قر ۇكىمەتىنىڭ قاۋلىسىمەن نۇرگۇل وسەربايقىزى ماۋبەرلينوۆا بەرگەن ءوتىنىشى بويىنشا قر اقپارات جانە قوعامدىق دامۋ ۆيتسە-ءمينيسترى قىزمەتىنەن بوساتىلدى.

نۇرگۇل ماۋبەرلينوۆا 1973 جىلدىڭ قاراشا ايىندا قاراعاندى وبلىسىندا دۇنيەگە كەلگەن. ساراننىڭ اباي اتىنداعى پەداگوگيكالىق ۋچيليششەسىن، ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن جانە قازتۇتىنۋوداعى قاراعاندى ەكونوميكالىق ۋنيۆەرسيتەتىن تامامداعان.

ەڭبەك جولىن 1992 جىلى باستاعان. ءار جىلدارى مەملەكەتتىك ورگاندار قۇرىلىمىندا جانە كوممەرتسيالىق سەكتوردا جۇمىس ىستەدى.

2006-2008 جىلدارى — قر مادەنيەت جانە اقپارات مينيسترلىگىنىڭ اقپارات جانە مۇراعات كوميتەتىنىڭ ەلەكتروندىق باق مونيتورينگى ءبولىمىنىڭ باس مامانى، باس ساراپشىسى، ءبولىم باستىعى.

2008-2012 جىلدارى — قر پرەمەر-ءمينيسترى كەڭسەسىنىڭ اقپاراتتىق-تالداۋ ورتالىعىنىڭ باس كونسۋلتانتى.

2012-2016 جىلدارى قر پرەزيدەنتى جانىنداعى «ورتالىق كوممۋنيكاتسيالار قىزمەتى» رمم ديرەكتورىنىڭ ورىنباسارى، قر پارلامەنتى ءماجىلىسى توراعاسىنىڭ كەڭەسشىسى قىزمەتتەرىن اتقارعان.

2016-2018 جىلدارى — قر اقپارات جانە كوممۋنيكاتسيالار مينيسترلىگىنىڭ اقپارات كوميتەتىنىڭ توراعاسى.

2018-2019 جىلدارى — قر اقپارات جانە كوممۋنيكاتسيالار ۆيتسە-ءمينيسترى.

2019-2020 جىلدارى — قر اقپارات جانە قوعامدىق دامۋ ۆيتسە-ءمينيسترى.

2020-2022 جىلدارى قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى بولدى.

2022 جىلعى اقپان ايىنان باستاپ قازىرگى ۋاقىتقا دەيىن قر اقپارات جانە قوعامدىق دامۋ ۆيتسە-ءمينيسترى بولدى.

Abai.kz