ورتالىق سايلاۋ كوميسسياسى 14 قاڭتاردا تۇستە سايلاۋدىڭ الدىن الا قورىتىندىسىن جاريالادى.
"ۆلاست" سايتىنىڭ توپتاستىرۋىنشا، بۇرىن سەنات دەپۋتاتى بولعان ءتورت ادام قايتا سايلانعان. سەناتقا وبلىس ءماسليحاتتارىنىڭ بەس حاتشىسى، ءتورت اكىم ورىنباسارى، ەكى اۋدان اكىمى، ءبىر وبلىستىق باسقارما جەتەكشىسى، مينيسترلىكتىڭ ورتاشا دارەجەدەگى ءبىر جەتەكشىسى وتكەن.
سايلانعانداردىڭ ۇشەۋى – ايەل. جاڭا دەپۋتاتتاردىڭ ورتاشا جاسى - 53,6: ەڭ ۇلكەنى – 62 جاستا، ەڭ جاسى 42 جاستا.
ورتالىق سايلاۋ كوميسسياسىنىڭ مالىمەتىنشە، سەنبى كۇنى 17 وبلىستان، استانا، الماتى جانە شىمكەنت قالالارىنان جيىنى 20 دەپۋتات سايلانۋى ءتيىس. 20 ورىننان 55 كانديدات ۇمىتكەر. الماتىدان – 4 كانديدات، الماتى، جەتىسۋ، جامبىل، پاۆلودار، سولتۇستىك قازاقستان، تۇركىستان وبلىستارىنىڭ ارقايسىسىنان ەكى كانديدات قاتىسادى. قالعان ايماقتار مەن شىمكەنت، استانا قالالارىنان ءۇش كانديداتتان قاتىسادى.
سايلاۋشىلار تىزىمىندە 3 168 ءماسليحات دەپۋتاتىنىڭ اتى-ءجونى بار. ولاردىڭ باسىم بولىگى تۇركىستان (317) جانە قوستاناي وبلىستارىنان (263).
سايلاۋشىلاردىڭ 50 پايىزدان استامى داۋىس بەرسە، سايلاۋ ءوتتى دەپ سانالادى. 50 پايىزدان كوپ داۋىس العان كانديدات سايلانادى.
كونستيتۋتسيا بويىنشا سەناتقا ءاربىر وبلىس، رەسپۋبليكالىق ماڭىزى بار قالا مەن استانادان ەكى دەپۋتاتتان سايلانادى. سەناتتا پرەزيدەنت تاعايىنداعان 15 دەپۋتات قالعان. بيىل كەزەكتەن تىس ءماجىلىس سايلاۋىنان كەيىن (مەرزىمى ازىرگە بەلگىلەنگەن جوق) سەناتتاعى ون دەپۋتاتتى پرەزيدەنت تاعايىندايدى. ولاردىڭ بەسەۋى قازاقستان حالقى اسسامبلەياسىنىڭ ۇسىنىسى بويىنشا تاڭدالادى.
بۇرىن قازاقستان حالقى اسسامبلەياسى ءماجىلىستىڭ توعىز دەپۋتاتىن دا سايلاعان. الايدا 2022 جىلى ناۋرىزدا پرەزيدەنت قاسىم-جومارت توقاەۆ "حالىققا جولداۋىندا" ءماجىلىس "ەشكىمگە جاساندى تۇردە ارتىقشىلىق بەرمەۋى ءتيىس", سايلاۋشىلار لاندشافتىنىڭ ايناسى بولۋى كەرەك دەپ مالىمدەگەن. ول اسسامبلەيا كۆوتاسى سەناتقا اۋىستىرىلىپ، سانى 9-دان 5-كە دەيىن ازايادى دەگەن.
بىلتىر ماۋسىمدا قازاقستان كونستيتۋتسياسىنا سايكەس وزگەرىستەر ەنگىزىلدى. بۇعان قوسا، ءماجىلىس دەپۋتاتتارىن پارتيا ءتىزىمى بويىنشا عانا ەمەس، ءبىر مانداتتى وكرۋگ بويىنشا سايلاۋدى دا قاراستىراتىن نورمالار ەنگىزىلگەن. كونستيتۋتسيادان ءبىرىنشى پرەزيدەنتكە قاتىستى نورمالار الىنىپ تاستالدى. بيلىك مۇنى "دەموكراتياعا قادام" دەپ سيپاتتاسا، سىنشىلار ء"ۇستىرت وزگەرىستەر مەن اۆتوريتار بيلىك رەجيمىنىڭ ساقتالىپ قالعانىن" ايتتى.
بىلتىر جىل سوڭىندا سەنات دەپۋتاتتىعىنا كانديدات رەتىندە تىركەلمەك بولعان بىرنەشە ازاماتتىق بەلسەندىنىڭ ءوتىنىشى قابىلدانبادى. ولار كونستيتۋتسيالىق قۇقىقتارىنىڭ بۇزىلعانىن ايتقان، ال ايماقتىق سايلاۋ كوميسسيالارى ولاردىڭ سايلاۋ زاڭىندا جازىلعان تالاپتارعا سايكەس ەمەستىگىن العا تارتقان.
قازاقستاندا سەنات پرەزيدەنتتىڭ ۇسىنىسىمەن جوعارعى سوت توراعاسى مەن سۋديالارىن، ادام قۇقىقتارى جونىندەگى ۋاكىلدى سايلايدى. سەنات پرەزيدەنتتىڭ كونستيتۋتسيالىق سوت توراعاسىن، ۇلتتىق بانك جەتەكشىسىن، باس پروكۋرور، ۇقك جەتەكشىسى، جوعارعى سوت كەڭەسى توراعاسىن تاعايىنداۋعا كەلىسىم بەرەدى.
ەلدە سەنات ءۇش جىل سايىن وتەدى.
Abai.kz
