كولىكتە راديو تىڭدايمىن. “قازاق راديوسى” مەن “شالقاردى” نەمەسە BBC-گە قوسىپ قويامىن.

اعىلشىنتىلدى الەم ۇيىرىنەن اداسقان گارري حانزادانىڭ Netflix-تە شىققان دەرەكتى ءفيلمىنىڭ ءىزىن باسا جارىق كورگەن كىتابىن تالقىلاپ جاتىر. حەيت تە كوپ، جاناشىرلىق تا بار. “اعام الىمجەتتىك كورسەتەتىن”، “تىعىلىپ ءشوپ شەگەتىن ەدىك” دەگەن سىڭايلى “جاڭالىقتاردى” جارىسا ايتىپ جاتىر.

العاشقى كۇنى 1,4 ملن دانا تيراجبەن ساتىلىپتى. رەكورد قويىپتى. ءبىر كۇندە ءبىر كىتاپ مۇنشا تيراجبەن ساتىلماعان ەكەن. پاتشا اۋلەتىندە بولعان اڭگىمە بولعان سوڭ، ەلگە قىزىق بولسا كەرەك، ايتپەسە، تەتەلەر تايتالاسىپ وسپەيتىن بە ەدى ءتايىرى.

ەەە… دەپ قويدىم. حالىققا قىزىق كەرەك، حانزاداعا قارجى قاجەت!

سوسىن الام دا، “قازاق راديوسىنا” نەمەسە “شالقارعا” قوسام. قاشان قوسساڭ دا، پروستاتيتكە پايدالى دەپ پروستەنول دەگەن پرەپاراتتى جارنامالاپ جاتادى. قازاقتىڭ ەڭ ءبىرىنشى اۋرۋى قان-تامىر جۇيەسى ەدى دەپ ويلاپ قويامىن. جانە تاڭەرتەڭ دە پروستەنول، كەشكە دە سول پروستەنول.

ءتىپتى پروستەنولعا ارنالعان باعدارلاما بار. تىڭدارماندار حابارلاسىپ جاتىر. تارازدان ءبىر كەلىنشەك حابارلاستى. “كۇيەۋىم ەرلەپ جاتىر” دەپ قويادى. تاعى ءبىر ادام ءزارىن سيپاتتاپ بەردى. كولىكتە تاڭەرتەڭ كوفە ءىشىپ بارا جاتىر ەدىم، وڭىشەمنەن وتپەي قالدى.

“قازاق/شالقار” راديوسى مەن BBC, ەكى راديو - ەكى الەم. ءبىرى ءپروستاتيتتى تالقىلاسا، ءبىرى جاڭا شىققان كىتاپتى تالقىلاپ جاتىر.

شىڭعىس مۇقان

Abai.kz