ۋكرايناعا رەسەي باسىپ كىرگەن ساتتە ونى وركەنيەتتى الەم بارىنشا قولدايتىنىن ءبىلدىردى. ءار ەل ءوز بەتىنشە گۋمانيتارلىق جانە اسكەري سالادا قول ۇشىن سوزىپ باقتى. الايدا بەرىلەتىن كومەكتى جۇيەلەۋ ماڭىزدى بولاتىن. قاي ەل قانداي كومەك بەرەتىنىن ءبىلۋ، ونىڭ جەتكىزىلۋ ۋاقىتىن انىقتاۋ ماقساتىندا گەرمانياداعى "رامشتاين" اسكەري بازاسىندا اي سايىن الەم ەلدەرىنىڭ 50-گە جۋىق مەملەكەتى كەزدەسۋ ۇيىمداستىرىپ، سول جەردە كيەۆتى قارۋمەن قولداۋ ماسەلەسى تالقى بولاتىن پلاتفورما قۇرىلدى. ول "رامشتاين كەزدەسۋى" دەپ اتالادى. 

رامشتايننىڭ سەگىزىنشى وتىرىسى 20 قاڭتاردا وتەدى. وعان بۇل جولى 50-دەن استام ەل قاتىسادى دەپ كۇتىلۋدە. جيىندا ۋكراينانى قولداۋ، وعان بەرىلەتىن كومەكتى ارتتىرۋ تالقى بولادى. ناقتى قانداي كومەك كورسەتىلەتىنى جايلى اقپارات جوق، الايدا بۇل جولى دا ءسوزسىز سوڭعى ەكى كەزدەسۋدەگىدەي زىمىران قورعانىس جۇيەلەرىن كوبىرەك بەرۋ تالقىلانادى. تاعى ءبىر تاقىرىپ رەتىندە باتىستىق تانكتەردى ۋكرايناعا بەرۋ ماسەلەسى كوتەرىلەدى.

ۋكرايناعا "Patriot" زىمىران قورعانىس جۇيەسىن بەرەتىنىن العاش بولىپ اقش جاريالاعان ەدى. ارتىنشا گەرمانيا دا ءدال وسى زىمىران قورعانىس جۇيەسىن بەرەتىنىن ايتتى، ال كۇنى كەشە نيدەرلاندى بۇل تىزىمگە قوسىلدى. وسىلايشا قازىردىڭ وزىندە ۋكرايناعا 3 "Patriot" زىمىران قورعانىس جۇيەسى بەرىلەتىنى انىق بولدى. رامشتايندا ەندى وزگە ەلدەر ۋكراينانى زىمىران شابۋىلىنان بارىنشا قاۋىپسىز ەتۋ ءۇشىن قانداي قورعانىس جۇيەلەرىن بەرە الاتىنى ايتىلادى، سارالانادى.

تاعى ءبىر ماڭىزدى تاقىرىپ باتىستىق ۇلگىدەگى تانكتەردى ۋكرايناعا بەرۋ ماسەلەسى. ۋكراينا قارسى شابۋىلعا شىعۋ ءۇشىن باتىستىق ۇلگىدەگى تانكتەردى سۇراپ كەلەدى. وسى ۋاقىتقا دەيىن باتىس كيەۆكە كەڭەستىك ۇلگىدەگى تانكتەردى بەرسە دە، باتىستىق ۇلگىدەگى تانكتەردى بەرمەگەن-ءدى. الايدا ۇلىبريتانيا بۇل قاعيدانى بۇزىپ، ۋكرايناعا زاماناۋي "Challenger-2" تانكتەرىن بەرەتىنىن ايتتى. بۇل وزگە باتىستىق ەلدەرگە مەسسەدج بولاتىن. پولشا دا ۋكرايناعا Leopard تانكتەرىن بەرەتىنىن مالىمدەدى. فينليانديا دا بەرۋگە دايىن. الايدا بۇل تانكتەردى شىعارۋعا گەرمانيا بولعاندىقتان ءۇشىنشى ەلگە تانكتى بەرۋ ءۇشىن بەرليننەن رۇقسات الۋ كەرەك. بەرلين وسى ۋاقىتقا دەيىن تانكتەردى بەرۋدەن قاشقاقتاپ كەلسە، ەندى ول شەشىمىن وزگەرتۋى مۇمكىن. كۇنى كەشە گەرمانيادا قورعانىس ءمينيسترى اۋىستى، جاڭا مينيستر كۇن تارتىبىندە تۇرعان باستى سۇراق ۋكرايناعا تانك بەرۋ ەكەنىن ايتتى. "رامشتاين" كەزدەسۋىندە گەرمانيا تانك بەرۋگە رۇقسات ەتىپ، ءوزى دە بۇل پروتسەسسكە قوسىلاتىنىن ايتۋى بولجانۋدا.

سەگىزىنشى كەزدەسۋ باستالماي جاتىپ، توعىزىنشى كەزدەسۋدىڭ قاشان وتەرى بەلگىلى بولدى. 24 اقپان قارساڭىندا باتىس ەلدەرى رامشتايندا باس قوسىپ، ۋكرايناعا رەكوردتىق دەڭگەيدە كومەك پاكەتىن جاريالاۋى مۇمكىن. ويتكەنى بۇل كۇنى رەسەيدىڭ ۋكراينا جەرىنە باسىپ كىرگەنىنە تۋرا ءبىر جىل بولادى.

كا مىرزا

Abai.kz