19 قاڭتاردا بىرقاتار تەلەگرام ارنالار رەسەي استاناسى ماسكەۋدە اۋە قورعانىس جۇيەلەرى ورناتىلا باستاعانى جايلى جازدى. الەۋمەتتىك جەلىدە اكىمشىلىك عيماراتتارعا كران ارقىلى اۋەقورعانىس جۇيەلەرىن قويىپ جاتقان ۆيدەولار مەن فوتولار تاراپ كەتتى.

فوتو مەن ۆيدەولاردا ونىڭ "پانتسير-س1" اۋە قورعانىس جۇيەسى ەكەنى ناقتى كورىنگەن. اۋە قورعانىس جۇيەلەرىنىڭ ءبىرى رەسەي قورعانىس مينيسترلىگىنىڭ شاتىرىنا ورناتىلعان.

جۋرناليستەردىڭ "اۋە قورعانىس جۇيەسىن نە ءۇشىن قويىپ جاتىر" دەگەن سۇراعىنا اسكەريلەر "بۇل بار بولعانى جاتتىعۋ" دەپ جاۋاپ قاتقان. ال رەسەيدىڭ ءباسپاسوز حاتشىسى پەسكوۆ بولسا، "اسكەري جاتتىعۋلار مەن تەحنيكاعا قاتىستى سۇراقتى مەنەن ەمەس، قورعانىس مينيسترلىگىنەن سۇراڭدار" دەيدى.

رەسەيلىك اسكەري ساراپشى، اسكەري كوررەسپوندەنت الەكساندر كوتس بولسا بىلاي دەيدى: "ماسكەۋدەگى بىرقاتار عيماراتتار مەن ساياباقتارعا اۋە قورعانىس جۇيەسىن ورناتىپ جاتقانعا قاتىستى پىكىر ءبىلدىرۋدى سۇراپ وتىر. ونىڭ فوتوسى مەن ۆيدەوسى بارلىق جەلىدە تاراۋدا. بۇعان قاتىستى پىكىر بىلدىرمەيمىن. الايدا بۇل جاقسى سيگنال. دەمەك، رەسەي بيلىگى ماسكەۋگە جاسالۋى مۇمكىن سوققىنىڭ الدىن الۋ كەرەكتىگىن تۇسىنە باستاعان. ال سوققى ەرتە مە، كەش پە جاسالارى ءسوزسىز", - دەيدى ول Telegram ارناسىندا.

20 قاڭتار كۇنى ماسكەۋدەگى پۋتين رەزيدەنتسياسىنا جاقىن ماڭدا تاعى ءبىر اۋە قورعانىس جۇيەسى ورنالاستىرىلعان ۆيدەو تارادى. الايدا وعان قاتىستى ناقتى اقپارات شىقپادى. رەسەي قورعانىس مينيسترلىگى بۇل ارەكەتىنە قاتىستى ماعلۇمات بەرمەدى.

Abai.kz