قازاقستان مەن يراننىڭ اراسىنداعى تاۋار اينالىمى قاڭتار-قاراشا ايلارىندا 20%-دان استامعا ءوسىپ، $500 ملن قۇرادى. سونىمەن قاتار ءوزارا ساۋدا كولەمىن ودان ءارى ۇلعايتۋ ماقساتىندا قازاقستان يران نارىعىنا جالپى قۇنى شامامەن $250 ملن بولاتىن قوسىمشا 75 تاۋار پوزيتسياسىن جەتكىزۋگە دايىن. بۇل تۋرالى پرەمەر-مينيستر ءاليحان سمايىلوۆتىڭ يران اۋىل شارۋاشىلىعى ءمينيسترى سەيەد دجاۆاد ساداتي نەدجادپەن كەزدەسۋىندە ايتىلدى، دەپ جازدى اقوردا.

«اۋىل شارۋاشىلىعى قازىرگى تاڭدا دامۋ پەرسپەكتيۆاسى وتە جوعارى سالا بولىپ وتىر. ونىڭ ءوزارا ساۋداداعى ۇلەسى – شامامەن 80%. ءبىزدىڭ ەلدەرىمىزدە اوك ءونىمىنىڭ تاۋار اينالىمىن $1 ملرد-قا دەيىن ارتتىرۋعا مۇمكىندىك بار»، — دەدى ءاليحان سمايىلوۆ.

قازاقستان ۇكىمەتى ەكى ەلدىڭ باسشىلارى قول قويعان جالپى ساۋدا كولەمىن $3 ملرد-قا دەيىن ۇلعايتۋ جونىندەگى مىندەتتى ورىنداۋ ءۇشىن بەلسەندى جۇمىس ىستەۋگە دايىن.

سونىمەن قاتار ءاليحان سمايىلوۆ ءوزارا ءىس-قيمىلدىڭ نەگىزگى باعىتتارىنىڭ ءبىرى كولىك-لوگيستيكا سالاسى ەكەنىن اتاپ ءوتتى. بۇل تۇرعىدا «سولتۇستىك-وڭتۇستىك» كولىك ءدالىزى ەرەكشە ماڭىزعا يە.

ءوز كەزەگىندە سەيەد دجاۆاد ساداتي نەجاد ساۋدا جانە جۇك تاسىمالداۋ كولەمىن ۇلعايتۋ ءۇشىن تەمىرجول جەلىسى مەن تەڭىز ينفراقۇرىلىمىن ودان ءارى دامىتۋدىڭ ماڭىزى زور ەكەنىن اتاپ ءوتتى، سونداي-اق يران قازاقستان نارىعىنا تسيترۋس ونىمدەرىن جەتكىزۋ كولەمىن كەڭەيتۋگە دايىن ەكەنىن مالىمدەدى.

Abai.kz