كەيىنگى اپتادا تۇركيا مەن شۆەتسيانىڭ قارىم-قاتىناسى ناشارلاپ كەتتى. انكارا ستوكگولم بىلتىر ناتو-عا قوسىلۋ كەلىسىمىن ورىنداماۋعا قۇلىقسىز بولدى دەپ ايىپتايدى. ونىڭ ۇستىنە، شۆەتسياداعى قۇراندى ورتەۋ اكتسياسىنان كەيىن سىن كۇشەيە ءتۇستى.

فينليانديا مەن شۆەتسيا ناتو-عا كىرۋگە بىلتىر ۋكرايناعا سوعىس باستالعاننان كەيىن، مامىر ايىندا ءوتىنىش بەرگەن. ەكى كورشى مەملەكەت سىرتقى ساياساتتا كوپ جىل بەيتاراپ بولىپ كەلگەن. ەندى ناتو-عا كىرۋ كەلىسىمىن ءوزارا ۇيلەستىرۋگە ۋاعدالاسقان.

ەردوعان سايلاۋشىلار الدىندا سويلەگەن سوزىندە: "قاجەت بولسا، فينليانديادان گورى شۆەتسياعا قاتىستى شەشىم باسقا بولادى. شۆەتسيا بۇل شەشىمگە تاڭعارالارى ءسوزسىز" دەدى.

شۆەتسيانىڭ ناتو-عا قوسىلۋ مۇمكىندىگىنە قاتىستى سويلەگەن ەردوعان ستوكگولمگە قۇراندى ورتەۋگە قاتىستى ەمەس، تەرروريزم ايىبى تاعىلعان ونداعان كۇرد بەلسەندىسىن ەلگە قايتارۋعا قاتىستى تالاپ قويدى.

"ناتو-عا كىرگىڭىز كەلسە، بىزگە سول تەرروريستەردى بەرىڭىزدەر" دەدى تۇركيا پرەزيدەنتى.

شۆەتسيا مەن فينليانديانىڭ ناتو-عا كىرۋى ءۇشىن وداقتىڭ بارلىق مۇشەسى – 30 مەملەكەت كەلىسىم بەرۋى كەرەك. 28 ەل كەلىسىم بەرىپ قويدى، ەندىگى قالعانى – تۇركيا مەن ۆەنگريا. ۆەنگريا جاقىندا كەلىسىم بەرەدى دەگەن مالىمەت بار.

Abai.kz