الەمنىڭ 30-دان اسا ەلى رەسەي مەن بەلارۋس سپورتشىلارىن حالىقارالىق جارىستاردان شەتتەتۋدى قولداپ وتىر. بۇل تۋرالى ۇلىبريتانيا ۇكىمەتى حابارلادى.

مالىمدەمەگە اقش، فرانتسيا مەن ۇلىبريتانيا قول قويعان. قۇجاتتا باستاماعا رەسەيدىڭ ۋكرايناعا جاساعان شابۋىلى تۇرتكى بولعانى جازىلعان

«رەسەي مەن بەلارۋس سپورتشىلارى جارىستارعا بەيتاراپ ستاتۋسپەن قاتىسىپ جۇرگەنىمەن، ءبارىبىر ولاردى مەملەكەتتەرى قارجىلاندىرادى... بەلارۋس پەن رەسەي سپورتشىلارى حالىقارالىق سپورت قاۋىمداستىعىنا ءوز ەلدەرى باستاعان سوعىس اياقتالعان كەزدە عانا قوسىلا الادى»،- دەلىنگەن مالىمدەمەدە.

ۋكراينا پرەزيدەنتى ۆلاديمير زەلەنسكي بيىل اقپاننىڭ باسىندا رەسەي سپورتشىلارىن وليمپيادا ويىندارىنان شەتتەتۋ كەرەك دەسە، ليتۆا، لاتۆيا، ەستونيا مەن پولشا سپورت مينيسترلەرى دە وسىعان ۇقساس مالىمدەمەلەر جاساعان.

حالىقارالىق وليمپيادا كوميتەتى قاڭتاردىڭ اياعىندا ۋكرايناداعى سوعىسقا اشىق قارسى شىققان رەسەي مەن بەلارۋس سپورتشىلارىن حالىقارالىق جارىستارعا بەيتاراپ تۋ استىندا قاتىستىرا بەرۋدى ۇسىنعان.

Abai.kz