اقش-تىڭ مەملەكەتتىك حاتشىسى ەنتوني بلينكەن س5+1 فورماتىنداعى ورتالىق ازيا ەلدەرى مينيسترلەرىنىڭ كەزدەسۋىنە قاتىسىپ، ەكونوميكا، ەنەرگەتيكا، ەكولوگيا جانە وڭىرلىك قاۋىپسىزدىك ماسەلەلەرىن تالقىلادى.

«اقش تاراپى پرەزيدەنت قاسىم-جومارت توقاەۆتىڭ باتىل رەفورمالارىن قولدايدى. وسىعان بايلانىستى ءبىز قازاقستان قابىلدايتىن شارالار مەن اتقاراتىن جۇمىستاردى باقىلايمىز. اسىرەسە، ادام قۇقىعىن قورعاۋ، جەمقورلىقتى جويۋ مەن پرەزيدەنتتىك مەرزىمگە قاتىستى جۇرگىزىلىپ جاتقان رەفورمالارىن اتاپ وتكىم كەلەدى»، - دەدى ەنتوني بلينكەن استانادا وتكەن C5+1 كەزدەسۋىنەن سوڭ.

ول Twitter جەلىسىندە «قايىرلى كۇن، قازاق ەلى!» دەپ جازبا قالدىردى. اقش مەملەكەتتىك حاتشىسى قازاقستانعا ساپارى ءساتتى وتكەنىن جازىپ، پرەزيدەنت قاسىم-جومارت توقاەۆ پەن سىرتقى ىستەر مينيسترلىگىنە قوناقجايلىعى ءۇشىن العىس ايتتى.

ەنتوني بلينكەن 28 اقپاندا استاناعا رەسمي ساپارمەن كەلگەن بولاتىن.

Abai.kz