ەلوردادا كوكتەمگى سۋ تاسقىنى قاۋپىنىڭ الدىن الۋ شارالارى قابىلداندى. بۇل تۋرالى استانا قالاسى توتەنشە جاعدايلار دەپارتامەنتى باستىعىنىڭ ورىنباسارى داستان الدابەكوۆ ءمالىم ەتتى.

«كوكتەمگى سۋ تاسقىنى كەزەڭىنە دايىندىق جۇمىسى قىزۋ ءجۇرىپ جاتىر. ەلوردا بويىنشا 21 سۋ تاسقىنى قاۋپى بار ۋچاسكەلەردە توتەنشە جاعدايلار دەپارتامەنتى جانە قالالىق كوممۋنالدىق قىزمەت جۇمىلدىرىلدى. سۋ تاسقىنى جاعدايىنا جەكە قۇرامنىڭ 145 مامانى، 76 تەحنيكا، 46 موتوپومپا جانە 2 ءجۇزۋ قۇرالى دايىن. سونىمەن قاتار، سۋ تاسقىنى قاۋپىنىڭ الدىن الۋ جانە بولدىرماۋ ماقساتىندا ءبىزدىڭ دەپارتامەنت كەشەندى ءىس-شارالار جوسپارىن ازىرلەدى»، - دەدى داستان الدابەكوۆ استانا قالاسى كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.

ونىڭ ايتۋىنشا، كەشەدەن بەرى ازاماتتىق قورعانىستىڭ مەملەكەتتىك جۇيەسىنىڭ باسقارۋ ورگاندارىن، كۇشتەرى مەن قۇرالدارىن توتەنشە جاعدايعا دايىنداۋ بويىنشا «كوكتەم-2023» رەسپۋبليكالىق كوماندالىق-شتابتىق وقۋ-جاتتىعۋى ءوتىپ جاتىر.

بۇعان دەيىن استانا سۋ قويماسىندا جاڭارتۋ جۇمىستارىنىڭ قولعا الىنعاندىعى تۋرالى حابارلاعان ەدىك.

Abai.kz