"اكىمشىلىك قۇقىق بۇزعانى ءۇشىن ۇستالعانداردىڭ ءبارى بوساتىلدى. جارتىسى سوت الدىندا جاۋاپ بەرەدى", - دەلىنگەن مالىمدەمەدە. بىراق سوت شەشىمىمەن جازاعا تارتىلعاندار دا بوساتىلادى ما، جوق پا، وعان جاۋاپ بەرمەگەن.

وسىعان دەيىن گرۋزيا استاناسى تبيليسيدە بىرنەشە كۇنگە سوزىلعان نارازىلىقتان كەيىن بيلىكشىل پارتيالار پارلامەنتتەن "شەتەل اگەنتى تۋرالى" داۋلى زاڭ جوبالارىن الىپ تاستايتىنىن مالىمدەدى.

7-8 ناۋرىزدا مىڭداعان ادام پارلامەنت ماڭىنا جينالىپ، داۋلى قۇجاتقا قارسىلىق بىلدىرگەن. پوليتسيا ولاردى تاراتۋ ءۇشىن جاس اعىزاتىن گاز، سۋ شاشقان. دەمونسترانتتار كۇش قۇرىلىمدارىنا تاس لاقتىرىپ، قوقىس جاشىكتەرىن ورتەپ، بارريكادا قۇرعان.

قۇجاتتى پارلامەنتكە ۇسىنعان باسقارۋشى "گرۋزين ارمانى" جانە "حالىق كۇشى" پارتيالارى 9 ناۋرىزدا تاراتقان مالىمدەمەسىندە كەيبىر كۇشتەر قۇجاتتى نەگىزسىز "رەسەيشىل زاڭ" دەپ اتاعانىن العا تارتقان، دەگەنمەن قوعام پىكىرىن ەسكەرە وتىرىپ، زاڭ جوباسىن كەرى قايتارعانىن جازعان.

وپپوزيتسيانىڭ ايتۋىنشا، "شەتەل ىقپالىنىڭ اشىقتىعى تۋرالى" جانە "شەتەل اگەنتتەرىن تىركەۋ تۋرالى" دەپ اتالاتىن ەكى زاڭ جوباسى گرۋزيا كىرۋگە ۇمتىلىپ وتىرعان ەۋروپا وداعىنىڭ ەرەجەلەرىنە قايشى جانە ول ۇكىمەتتىك ەمەس ۇيىمداردىڭ جۇمىسىنا كوپ كەدەرگى جاسايدى.

بيلىكشىل "حالىق كۇشى" فراكتسياسى جەتەكشىلەرىنىڭ ءبىرى گۋرام ماچاراشۆيلي زاڭ جوباسى 1938 جىلى اقش قابىلداعان FARA (The Foreign Agents Registration Act) زاڭىنىڭ تاجىريبەسى بويىنشا جاسالدى دەگەن ءۋاج ايتقان. الايدا وپپوزيتسيا مۇنى "دەماگوگيا، شىن مانىندە، وسى زاڭدار ارقىلى بيلىك ازاماتتىق بەلسەندىلىك پەن وي-پىكىر ەركىندىگىن رەسەيدەگىدەي باسىپ-جانشىعىسى كەلەدى" دەپ ەسەپتەيدى.

Abai.kz