بۇگىن سەناتتىڭ جالپى وتىرىسىندا دەپۋتات شاكارىم بۇقتۇعۇتوۆ 2022 جىلدىڭ 1 قاڭتارىندا مەملەكەتتىك قارىز سوماسى 21,9 ترلن تەڭگەنى قۇراعانىن، ال ءبىر جىلدان كەيىن بۇل كورسەتكىش 25,3 ترلن تەڭگەگە دەيىن وسكەنىن ايتتى.

ال قارجى ءمينيسترى ەرۇلان جاماۋباەۆ مەملەكەتتىك قارىز ماسەلەسى ۇكىمەتتىڭ تۇراقتى باقىلاۋىندا تۇرعانىن ايتتى.

«الەمدە ينفلياتسيانىڭ دەڭگەيى وتە جوعارى ەكەنى بەلگىلى. سوندىقتان بازالىق ستاۆكا دا وسكەن. بۇل تۇرعىدا سىرتتان قاراجات تارتۋ نەمەسە بيۋدجەت تاپشىلىعىن قارجىلاندىرۋ ءۇشىن ىشتەن قارىز الۋ قىمباتقا تۇسەدى. ارينە، ينفلياتسيا دەڭگەيى تومەندەسە، بازالىق ستاۆكا ازايسا، بۇل جۇكتەمە ءبىرشاما جەڭىلدەيدى»، - دەدى ە. جاماۋباەۆ.

سونىڭ قاتار ول بيىل ەلىمىزدەگى بيۋدجەت كىرىسى وسەتىنىن ايتتى.

«ەكىنشىدەن، ەلىمىزدەگى بيۋدجەت تاپشىلىعىن بىرتىندەپ ازايتامىز. ونىڭ دەڭگەيىن بيىل 2,7 پايىز شاماسىندا قالدىردىق، سەبەبى ونى وسىرۋگە بولمايدى. وسى ورايدا ونىڭ سوماسى 3,2 ترلن تەڭگەنى قۇرادى. بيىلعى ناقتىلاۋدان كەيىن بيۋدجەتتىڭ كىرىس كوزى تاعى دا 42 پايىزعا وسەدى. بۇل تۇرعىدا سالىق ءارى كەدەندىك اكىمشىلەندىرۋ ەسەبىنەن 720 ملرد تەڭگە قوسىمشا قاراستىرىپ وتىرمىز»، - دەدى مينيستر.

«قازىر نەگىزىنەن ىشكى نارىقتان قاراجات تارتىپ وتىرمىز. مەملەكەتتىك قارىز جالپى ىشكى ونىمگە شاققاندا 32 پايىزدان اسپايدى دەپ ەسكەرىلگەن»، - دەدى ە. جاماۋباەۆ.

بۇدان بۇرىن حابارلانعانداي، بيىلعا ارنالعان رەسپۋبليكالىق بيۋدجەتتىڭ پارامەترلەرى كەلەسىدەي قالىپتاستى، ياعني بيۋدجەت تۇسىمدەرى 1,5 ترلن تەڭگەگە ۇلعايا وتىرىپ، 19,3 ترلن تەڭگەنى قۇراماق. تاپشىلىق جالپى ىشكى ونىمگە قاراعاندا 2,7% دەڭگەيىندە ساقتالدى. رەسپۋبليكالىق بيۋدجەتتىڭ شىعىستارى 22,5 ترلن تەڭگە كولەمىندە جوسپارلانىپ وتىر.

Abai.kz