قىتاي توراعاسى سي تسزينپين ورتالىق ازيا ەلدەرىنىڭ باسشىلارىن ناۋرىز مەرەكەسىمەن قۇتتىقتاپ، ولاردى بيىل مامىر ايىندا "قىتاي - ورتالىق ازيا" سامميتىنە شاقىرعان. پرەزيدەنت سي وسى كەزدەسۋلەردەن "ۇلكەن" ءۇمىت كۇتەتىنىن، جوسپارى "كوپ" ەكەنىن مالىمدەگەن.

رەسەي ۋكراينامەن سوعىسىپ جاتقان ۋاقىتتا قىتاي توراعاسىنىڭ ورتالىق ازيا باسشىلارىمەن جاڭا فورماتتا كەزدەسۋىنە ساراپشىلار نازار اۋداردى.

"قىتاي باسشىسى مەن ورتالىق ازيا ەلدەرىنىڭ باسشىلارى ءسامميتى وتەتىنى قىتايدىڭ ايماق ەلدەرىن ءتۇرلى ادىستەرمەن وزىنە تاۋەلدى ەتكىسى كەلەتىنىن اڭعارتادى. 2019 جىلى قىتاي جاعى س+س5 (قىتاي+ورتالىق ازيا) مەحانيزمىن ىسكە قوسقان. بىراق ول ءداستۇرلى مەحانيزم بولعان، فورۋمعا سىرتقى ىستەر مينيسترلەرى قاتىسقان. ەندى مۇنداي كەزدەسۋلەر جوعارى دەڭگەيدە ۇيىمداستىرىلماق", - دەيدى قىتاي جانە ورتالىق ازيانى زەرتتەۋ ورتالىعىنىڭ ساراپشىسى رۋسلان ءىزىموۆ.

ونىڭ پىكىرىنشە، پەكين شىڭجاڭ ۇيعىر اۆتونوميالى ولكەسىندە تۇراقسىزدىق بولعانىن قالامايدى، ورتالىق ازيا ەلدەرىندە تۇراقتىلىق ساقتالعانىنا، قازىرگى جۇيەلەردى ساقتاۋعا كۇش سالادى.

تاۋەلسىز ساياساتتانۋشى پارۆيز مۋللوجانوۆ ماسكەۋدىڭ پەكينگە ەكونوميكالىق جانە ساياسي تاۋەلدىلىگى ارتقان ۋاقىتتا، كرەمل قىتايدىڭ ورتالىق ازياعا ىقپالى ارتۋىنا كەدەرگى جاساۋعا تىرىسپايدى دەپ ەسەپتەيدى. "قىتاي ايماقتا اسكەري بازاسىن اشقىسى كەلەتىنىن دە اشىق ايتۋى عاجاپ ەمەس. ماسكەۋ كەلىسەدى، ويتكەنى ونىڭ باسقا امالى جوق", - دەيدى ساراپشى.

People’s Daily مالىمەتىنشە، 2020 جىلدىڭ اياعىندا قىتايدىڭ ورتالىق ازياداعى ينۆەستيتسياسى شامامەن 40 ملرد دوللار بولعان. قىتاي ينۆەستيتسياسىنىڭ 21,4 ملرد دوللارى قازاقستانعا قۇيىلعان. 2021 جىلدىڭ اياعىندا ورتالىق ازيادا 7 مىڭ 700 قىتاي فيرمسى جۇمىس ىستەگەن.

DoubleThink Lab تايۆان ۇيىمى قىتايدىڭ الەم ەلدەرىنە ىقپالىنىڭ رەيتينگىن دايىنداعان. وندا قىرعىزستان 8, تاجىكستان 9, قازاقستان 15, وزبەكستان 24, ال تۇركىمەنستان 25-ورىندا تۇر.

Abai.kz