دۇيسەنبى, 15 شىلدە 2024
1258 0 پىكىر 30 ناۋرىز, 2023 ساعات 13:18

الماتىدا 21 كانديدات پروكۋراتۋراعا ارىز جازدى

الماتىدا ءماجىلىس پەن ءماسليحات سايلاۋىنا ءبىرمانداتتى وكرۋگتەردەن قاتىسقان 21 كانديدات 29 ناۋرىزدا پروكۋراتۋراعا ۇجىمدىق شاعىم ءتۇسىردى. ولار سايلاۋ كەزىندەگى زاڭسىزدىقتار تەكسەرىلسىن، زاڭ بۇزعاندار قىلمىستىق جاۋاپقا تارتىلسىن دەگەن تالاپ قويدى.

ۇجىمدىق شاعىمعا 20 كانديدات قول قويعان. نارازى كانديداتتىڭ كەيبىرى ورتالىق سايلاۋ كوميسسياسى دەپۋتاتتىققا ۇمىتكەرلەردى الالادى دەپ ەسەپتەيدى.

– باسىندا بارىمىزگە مەكتەپتەرگە كىرىپ، ۇگىت-ناسيحات جاساۋعا تەڭ مۇمكىندىك بەرىلگەن. الايدا كوپ جەرگە مەنى كىرگىزبەدى. ءوز اۋدانىمداعى ءار ۇيگە كىرىپ شىقتىم، بىراق حالىقتى جيناپ، سايلاۋالدى باعدارلامامدى تانىستىرۋ قيىن بولدى، – دەدى الماتى ءماسليحاتى دەپۋتاتتىعىنا كانديدات بولعان ولجاس ابىلقايىر.

شاعىمعا قول قويعاندار اراسىندا ۇگىت-ناسيحات ءۇشىن مەملەكەت بەرەتىن قارجىنى ءالى دە الا الماي جۇرگەندەر دە بولدى.

– مەملەكەت ۇگىت-ناسيحاتقا 300 مىڭ تەڭگە كولەمىندە قارجى بولگەن. مەن [سونى ەسەپتەپ،] Royal Petrol [جانارماي قۇيۋ بەكەتىمەن] 1110 ليتر جانارماي الاتىن بولىپ، كەلىسىمشارت جاساستىم. تالون دايىن تۇردى، اقشا تولەنسە، الاسىڭ دەدى. بىراق اقشا اۋدارىلعان جوق. [سايلاۋدا] تەڭدىك بولعان جوق. ۇمىتكەرلەرگە تەڭدەي جاعداي جاسالۋى كەرەك. سايلاۋ زاڭى بۇزىلىپ وتىر، – دەدى الماتى وبلىسىنداعى №12 ءبىرمانداتتى وكرۋگتەن سايلاۋعا تۇسكەن كانديدات مەيىرحان ءابدىماناپوۆ.

20 ادام قول قويعان شاعىمدا كانديداتتار زاڭبۇزۋشىلىققا جول بەرگەن ورتالىق سايلاۋ كوميسسياسىنىڭ توراعاسى نۇرلان ءابدىروۆتى جاۋاپقا تارتۋدى تالاپ ەتكەن.

ولارمەن بىرگە الماتىداعى №4 ءبىرمانداتتى وكرۋگتەن سايلاۋعا تۇسكەن كانديدات سانجار بوقاەۆ ءۇش ۋچاسكەنىڭ ۇستىنەن شاعىمداندى. ول سايلاۋ كوميسسيالارى داۋىس سانىن بۇرمالادى دەپ ەسەپتەيدى.

– مەنىڭ قولىمدا 202 ۋچاسكەنىڭ 192 حاتتاماسى بار. سونداعى داۋىستى Google كەستەسىمەن دە، Excel-مەن دە، قولمەن دە سانادىق. ناتيجەسىندە مەن جەڭىپ تۇرمىن. ال ورتالىق سايلاۋ كوميسسياسى باسقا ادامدى جەڭدى دەپ، [بيلىككە] ىڭعايلى ادامدى وتكىزدى. ءبىز وندايعا كەلىسپەيمىز، – دەدى بۇرىنعى كانديدات ازاتتىققا.

بوقاەۆتىڭ 20 ناۋرىزدا الماتى اكىمشىلىك سوتىنا جازعان تالابى ورىندالماعان. اپپەلياتسيالىق سوت تا كوميسسيا توراعاسىنىڭ جاۋابىنا سۇيەنىپ، "داۋىس بەرۋ زاڭ شەڭبەرىندە ءوتتى" دەگەن شەشىم شىعارعان.

الماتى قالالىق پروكۋراتۋراسى بۇرىنعى كانديداتتاردىڭ شاعىمىن قابىلداپ، "زاڭدا بەلگىلەنگەن مەرزىمدە جاۋاپ بەرەمىز" دەدى.

بەلسەندىلەر پروكۋراتۋرا الدىندا نارازىلىق ءبىلدىرىپ، پىكىرىن ايتىپ تۇرعان كەزدە ولاردى جولدىڭ ار جاعىنان بىرنەشە پوليتسيا قىزمەتكەرى باقىلاپ تۇردى.

19 ناۋرىزدا الماتىداعى 256 ۋچاسكەنى باقىلاعان "قازاقستان جاستار اقپاراتتىق قىزمەتى" قوعامدىق قورىنىڭ ەسەبىنشە دە، №4 ءبىرمانداتتى وكرۋگتە داۋىس سانى بۇرمالانعان.

ء"بىزدىڭ قولىمىزعا تۇسكەن حاتتامالار بويىنشا، ءتورتىنشى وكرۋگتە كانديدات سانجار بوقاەۆ كوش باستاپ تۇر. ال رەسمي دەرەكتە باسقا كانديدات جەڭدى" دەگەن ۇيىم توراعاسى يرينا مەدنيكوۆا 28 ناۋرىزدا.

ول ورتالىق سايلاۋ كوميسسياسىنان وسى جاعدايعا تۇسىنىكتەمە بەرۋىن، بولماسا، داۋىستى قايتا ساناپ نەمەسە ءتورتىنشى وكرۋگتە داۋىس بەرۋدى قايتا وتكىزۋىن سۇراعان.

سانجار بوقاەۆتىڭ سايلاۋ كوميسسيالارىنا جازعان شاعىمىنا ءالى جاۋاپ كەلمەگەن.

كەزەكتەن تىس سايلاۋعا ءوز-ءوزىن ۇسىنىپ، ءماجىلىس پەن ماسليحاتقا وتپەي قالعان كانديداتتار داۋىس بەرۋ كەزىندە زاڭ بۇزىلعانىن ايتىپ، سايلاۋ ناتيجەسىن مويىندامايتىنىن مالىمدەدى. ەلدىڭ كەمى ءتورت وڭىرىندە: الماتىدا، استانادا، شىمكەنتتە، ورالدا سايلاۋعا تۇسكەن ۇمىتكەرلەر سايلاۋ ناتيجەسىن جويۋدى، داۋىس بەرۋدى قايتا وتكىزۋدى تالاپ ەتكەن.

24 ناۋرىزدا الماتىدا دەپۋتاتتىققا ۇمىتكەر ازاماتتار مەن ولاردىڭ سەنىمدى وكىلدەرى، قوعام بەلسەندىلەرى جيىن وتكىزىپ، "حالىق پارلامەنتى" قۇرىلعانىن جاريالادى.

بۇعان دەيىن باس پروكۋراتۋرا سايلاۋ كۇنى زاڭبۇزۋشىلىقتار بولعانىن مويىنداعانىمەن، "بۇل فاكتىلەر سايلاۋ قورىتىندىسىنا اسەر ەتپەدى" دەپ مالىمدەگەن.

قازاقستانداعى كەزەكتەن تىس ءماجىلىس پەن ءماسليحات سايلاۋىنىڭ ناتيجەسىندە پارلامەنتكە التى ساياسي پارتيا ءوتتى. ماجىلىسكە 98 دەپۋتاتتىڭ 29-ى ءبىرمانداتتى وكرۋگتەر ارقىلى سايلاندى. 40 ورىن "امانات" پارتياسىنىڭ وكىلدەرىنە ءتيدى. ءبىرمانداتتى وكرۋگتەر بويىنشا وتكەن 29 كانديداتتىڭ 22-ءسى – "امانات" پارتياسىنىڭ وكىلى.

سايلاۋدى باقىلاعان ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) دەموكراتيالىق ينستيتۋتتار جانە ادام قۇقىقتارى بيۋروسىنىڭ (دياقب) سايلاۋدى باقىلاۋ ميسسياسى داۋىس ساناۋ پروتسەسىنە الاڭداۋشىلىق بىلدىرگەن. ەلدەگى تاۋەلسىز باقىلاۋشىلار دا سايلاۋدا زاڭبۇزۋشىلىق كوپ تىركەلگەنىن مالىمدەدى.

Abai.kz

0 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1208
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 1899
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 1942