ءماجىلىس دەپۋتاتى ەرمۇرات باپي «ۇلتارازدىقتى قوزدىردى» دەگەن ايىپ تاعىلىپ، 5 جىلعا سوتتالعان بلوگەرلەر مارعۇلان بورانباەۆ پەن دانات نامازباەۆتى بوساتۋدى سۇرادى.

دەپۋتات بۇل تۋرالى باس پروكۋرور بەرىك اسىلوۆقا جولداعان ساۋالىندا باياندادى.

ول سونداي-اق تاياۋدا پەتروپاۆل قالاسىندا «قازاقستاننان تاۋەلسىزبىز» دەپ جاريالاعان سەپاراتيستىك توپتىڭ ءىس-ارەكەتىنە توقتالدى.

ەرمۇرات باپيدىڭ ايتۋىنشا، اتالعان وقيعانى «جاڭا قازاقستان» يدەياسىنا قارسى باعىتتالعان جانە وعان تىكەلەي تونگەن قاتەردىڭ بىرەگەي بەلگىسى دەپ باعالاۋ كەرەك.

«ەل ىشىنە جىك سالۋ سيندرومى قوعامنىڭ قاتتى الاڭداۋشىلىعى مەن زىعىردانىن تۋعىزىپ وتىر. ءسىز بەن ءبىز بۇل مەملەكەتتىك قاسكۇنەمدىككە قىزمەت بابىمەن عانا ەمەس، ازاماتتىق جاۋاپكەرشىلىك پەن پەرزەنتتىك پارىز تۇرعىسىندا الاڭداۋشىلىق ءبىلدىرۋىمىز كەرەك. ءبىزدىڭ ەلدىڭ نامىسىن قورعاعان ۇلتجاندى ازاماتتار مارعۇلان بورانباەۆ پەن دانات نامازباەۆ «ۇلتارالىق ارازدىقتى قوزدىردى» دەگەن جەلەۋمەن ارقايسىسى 5 جىلعا سوتتالىپ كەتتى. انىعىندا، بۇل ازاماتتار ۇلتارالىق ارازدىقتان بۇرىن قازاق حالقىنىڭ نامىسىن جىرتىپ، ۇلتتىق مۇددەنى قورعاپ، الەۋمەتتىك جەلىلەردەگى سەپاراتيستىك كوزقاراستارعا قارسى شىققانى ءۇشىن سوتتى بولدى. بۇل جىگىتتەرگە ورەسكەل قيانات جاسالدى. كورشىلەس ەلدەردىڭ ەلىرمەلەرى اۋزىنا كەلگەنىن ايتىپ جانە جازىپ جاتقان الاۋىز پىكىرلەرمەن سالىستىرعاندا، م.بورانباەۆ پەن د.نامازباەۆتىڭ الەمجەلىدەگى ارەكەتى بالانىڭ ويىنى بولىپ قالدى. ولارعا جاسالعان قيانات پەن ادىلەتسىزدىك وسى سالىستىرۋدان تۋىندايدى. ءبىر ەل نەگە ءوزىنىڭ سىڭارەزۋ ساياساتشىلارىنا تىيىم سالمايدى، ءبىزدىڭ ەل نەگە ءوزىنىڭ ەلدىك مۇددەسى مەن حالىقتىق نامىسىن قورعاعان ازاماتتارىن سوتتايدى؟»، – دەدى ول.

دەپۋتات ەل نامىسىنا اراشا تۇسكەن ەكى ازاماتتىڭ سوتتى بولۋى ادىلەتسىزدىك دەپ سانايتىنىن جەتكىزدى.

«كورشى ەلدىڭ ۇرانشىلارى قىلمىستىق سوتقا تارتىلماق تۇگىلى، ءوز بيلىگى مەن ءتيىستى ورگاندارى تاراپىنان اكىمشىلىك تۇرعىدا ەسكەرتۋ دە العان جوق. ال ەل نامىسىنا اراشا تۇسكەن ەكى جىگىت نەگە سوتتى بولادى؟ ەندەشە، بۇعان دەيىن قازاقستاندا بولىپ كەلگەن سەپاراتيزم سيندرومىن جانە پەتروپاۆل قالاسىنداعى جۋىقتا بولعان جىكشىلدەنۋدىڭ جيىركەنىشتى جاعداياتىن ەسكەرە وتىرىپ، مارعۇلان بورانباەۆ پەن دانات نامازباەۆقا قاتىستى ۇكىمدى قايتادان قارايتىن ۋاقىت تا، ساياسي سەبەپ تە، ۇلتتىق قاۋىپسىزدىك مۇقتاجدىعى دا تۋدى دەپ ەسەپتەيمىن! قازاقستاننىڭ جوعارعى سوتىنان مارعۇلان بورانباەۆ پەن دانات نامازباەۆقا قاتىستى سوت ۇكىمىن قايتادان قاراۋعا، ولاردى تۇرمەدەن بوساتۋعا پارمەن بەرۋىڭىزدى سۇرايمىن»، – دەدى ەرمۇرات باپي.

ايتا كەتەيىك، جاقىندا پەتروپاۆلدا بىر توپ ادام وزدەرىنىڭ قازاقستاننان «تاۋەلسىز» ەكەندەرىن ايتىپ، «حالىق كەڭەسىن» قۇرعانىن الەۋمەتتىك جەلىگە جاريالاعان بولاتىن. ولار قازاقستاندى زاڭسىز جاريالانعان مەملەكەت دەپ اتادى.

قازىر بۇل توپتىڭ ۇستىنەن قىلمىستىق كودەكستىڭ 180-بابى 2-بولىگى «سەپاراتيزمدى ناسيحاتتاۋ» بويىنشا تەرگەۋ باستالدى.

Abai.kz