مەملەكەت باسشىسى قاسىم-جومارت توقاەۆ ەل تۇرعىندارىن قازاقستان حالقىنىڭ بىرلىگى مەرەكەسىمەن قۇتتىقتادى، دەپ حابارلايدى  اقوردا.

قادىرلى وتانداستار!

سىزدەردى قازاقستان حالقىنىڭ بىرلىگى مەرەكەسىمەن شىن جۇرەكتەن قۇتتىقتايمىن!

بۇل – تۇراقتىلىق پەن تىنىشتىقتى، تاتۋلىق پەن كەلىسىمدى دارىپتەيتىن مەيرام.

ەل بىرلىگى – ءبىزدىڭ باعا جەتپەس بايلىعىمىز، مەملەكەتتىلىگىمىزدىڭ بەرىك نەگىزى. قازاق جەرى سان الۋان ەتنوس وكىلدەرىنىڭ قۇتتى مەكەنىنە اينالعان. بارلىق ازاماتتارىمىز وتكەن تاريحى، بۇگىنى مەن بولاشاعى ءبىر ەكەنىن تەرەڭ ۇعىنادى. ويتكەنى جۇرتىمىزدىڭ قۇندىلىقتارى دا، ارمان-مۇراتتارى دا ورتاق. تۇپتەپ كەلگەندە، ءبارىمىز – ۇلكەن قارا شاڭىراقتىڭ، ءبىرتۇتاس قازاق ۇلتىنىڭ پەرزەنتتەرىمىز.

ەلىمىزدىڭ ءوسىپ-وركەندەۋى قولعا العان رەفورمالاردىڭ ءتيىمدى جۇزەگە اسىرىلۋىنا بايلانىستى. ءبىز وسى ىرگەلى ماقساتتارعا مىزعىماس بىرلىكتىڭ ارقاسىندا عانا قول جەتكىزەمىز.

حالقىمىز «ىرىس الدى – ىنتىماق» دەيدى. بابالارىمىزدىڭ بۇل وسيەتى – ادىلەتتى قازاقستانداعى باستى ۇستانىمنىڭ ءبىرى. ءبىز تاتۋلىق، تەڭدىك جانە ادىلدىك قاعيدالارىنا نەگىزدەلگەن قوعام قۇرامىز.

بىرلىگى جاراسقان جۇرتىمىزدىڭ ابىرويى اسقاق بولسىن!

بارشاڭىزعا باق-بەرەكە جانە تولاعاي تابىس تىلەيمىن!

مەرەكە قۇتتى بولسىن، اعايىن!

ايتا كەتەيىك، قازاقستان حالقىنىڭ بىرلىگى كۇنى مەرەكەسى مەملەكەت باسشىسىنىڭ جارلىعىنا سايكەس، 1996 جىلدان بەرى اتاپ ءوتىلىپ كەلەدى.

Abai.kz