بۇل تۋرالى قر ساۋدا جانە ينۆەستيتسيالار ءمينيسترى – ۆيتسە-پرەمەر سەرىك جۇمانعارين ۇكىمەت وتىرىسىندا ايتتى.

«2022 جىلدىڭ قورىتىندىسى بويىنشا الەۋمەتتىك ماڭىزى بار ازىق-تۇلىك تاۋارلارىنىڭ توعىز اتاۋى بويىنشا 16,2%-دان 55,9% - عا دەيىن يمپورتقا تاۋەلدىلىك بار جانە قانت بويىنشا يمپورتقا تاۋەلدىلىك 90%-دان اسادى»، - دەدى مينيستر.

ونىڭ سوزىنشە، قازاقستان نەگىزىنەن تاۋىق ەتى، ىرىمشىك پەن سۇزبە، سارى ماي مەن كۇنباعىس مايى، ماكارون جانە ماۋسىمارالىق كەزەڭدە – قىرىققابات پەن پيازدىڭ يمپورتىنا تاۋەلدى.

بۇعان دەيىن پرەزيدەنت توقاەۆ قازاقستاندا ينفلياتسيا سوڭعى 15 جىلدا بولماعان دەڭگەيگە جەتكەنىن ايتىپ، مۇنى اۋىل شارۋاشىلىعى جانە ءوندىرىس سالاسىنىڭ ناشار دامۋىنان كورگەن.

«ازىق-تۇلىك ينفلياتسياسىنىڭ باستى سەبەبى دە – وسىندا. ەلىمىزدە وندىرىلەتىن تاۋاردىڭ كولەمى ىشكى سۇرانىستى قامتاماسىز ەتۋگە جەتپەيدى. يمپورتقا تاۋەلدىمىز»،-دەگەن بولاتىن پرەزيدەنت.

Abai.kz