ءبىرازدان بەرى الەمجەلىدە الماتى قالالىق ءماسليحاتىنىڭ دەپۋتاتى اننا باشينسكايا دەگەن اسا بەلسەندى «حالىق قالاۋلىسىنىڭ» «ەرەكشە ەرلىگى» جايلى اقپارات جەلدەي ەسىپ ءجۇر. ول وڭتۇستىك استانانىڭ تورىندە وتىرىپ الىپ، بوتەن تاۋەلسىز ەلدىڭ باسشىسى – ۋكراينانىڭ پرەزيدەنتى ۆلاديمير زەلەنسكيگە «اقىل ۇيرەتىپتى». بۇل اننا دەگەن مىقتىمىز زەلەنسكيدىڭ «قىرىمدى قايتارىپ الامىز» دەگەن سوزىنە شابىنا شوق تۇسكەندەي شامدانىپ: «سەن ودان دا انا تۇركيانى باسىپ ال. ول جاق – جىلى، جانعا جايلى»، – دەپ كەكەتىپ-مۇقاتىپ باعىپتى. ءسىرا، رەسەيگە دەگەن اسا جاناشىرلىق سەزىمى جانىنا تىنىشتىق بەرمەسە كەرەك.

ەڭ قىزىعى، مۇنى ءبىر مانداتتى وكرۋگتەن «امانات» پارتياسى ۇسىنسا كەرەك. ەندى بۇعان بيلىكتىڭ پارتياسى نە ىستەر ەكەن؟ ەگەر بۇرىنعى «نۇر وتان»: «بۇل كىسى ءبىر مانداتتىق وكرۋگتەن وتكەن، ونى حالىق سايلاعان. ءبىز نە ىستەي الامىز؟» دەپ وتىرىك شاراسىزدىق تانىتسا، ءتىپتى دە تاڭ قالمايمىز. ويتكەنى رەسەيگە بۇيرەگى بۇرىپ، ونىڭ باسقىنشىلىق ارەكەتىنە «اسا تۇسىنىسىكپەن» قارايتىن جالعىز بۇل ەمەس. وتكەندە ءماجىلىس دەپۋتاتى، ءوزىمىزدىڭ قازاق ازاماتى ءپۋتيننىڭ ارنايى اسكەري وپەراتسياسىنا اشىقتان-اشىق قولداۋ ءبىلدىرىپ جاتقاندا وزگە ۇلت وكىلىنىڭ بۇل ءىسى ءتىپتى دە ورەسكەل ەمەس سياقتى كورىنەدى.

ال ەندى اننا باشينسكايا دەگەن كىم، ول قانداي اسپاندى تىرەپ تۇر – سوعان كەلەلىك. بۇل مىقتىمىز وسى شاھاردا اتاعىنان ات ۇركيتىن «لەۋ فيرماسى» دەپ اتالاتىن جاۋاپكەرشىلىگى شەكتەۋلى سەرىكتەستىگىنىڭ قوسىمشا قۇرىلتايشىسى بولىپ شىقتى. بۇل كومپانيانىڭ ەسەپ شوتىندا جالپى كولەمى 6,4 ميلليارد تەڭگەنى قۇرايتىن مەملەكەتتىك كونتراكتى بار كورىنەدى. ونىڭ ىسكەرلىك سەرىكتەستىكتەرى اۋەزوۆ جانە المالى اۋداندىق اكىمدىگىنىنڭ اپپاراتى، قالالىق اكىمدىكتىڭ ەكولوگيا جانە قورشاعان ورتانى قورعاۋ باسقارماسى سەكىلدى قارجىسى مول مەكەمەلەر بار. بيىل بۇل كومپانيا الماتى قالاسىنىڭ اكىمدىگىمەن كەلىسىم بويىنشا شاھارداعى ءبىراز ساياباقتى جوندەپ، قالتاسىن ءبىرشاما قومپيتاتىن كورىنەدى.

باسە دەيمىز-اۋ، بۇل كىسى نەگە ەكىلەنىپ ءجۇر دەسەك، «قامباسىنا» سىيماي، اعىلىپ-توگىلىپ جاتقان قارجىسىنىڭ جەلىگى ەكەن عوي جەلپىندىرىپ جۇرگەن! ءسىرا، كەزىندە باي كاسىپكەردىڭ ءبىرى – راۆيل مۋحورياپوۆ دەگەننىڭ: «ورىسشا سويلەگەنگە قازاقشا جاۋاپ بەرۋ – بارىپ تۇرعان ۇلتشىلدىق»، – دەگەن ءسوزى قولتىعىنا سۋ بۇرىككەن سەكىلدى. دەمەك، بىزدە سول باياعى «اۋزى قيسىق بولسا دا، باي بالاسى سويلەسىن» دەگەن ۇران اسا كوكەيتەستى دۇنيەگە اينالسا كەرەك. ولار نە ايتسا دا مۇرتىن بالتا شاپپايتىنىنا بەك سەنىمدى كورىنەدى.

تاعى كىم ءتىلىن قايراپ، ءسوزىن دايىنداپ كۇتىپ وتىر ەكەن؟ ءسال شىداي تۇرالىق، كوپ كۇتتىرە قويماس.

جايبەرگەن بولاتوۆ

Abai.kz