قازاقستان مەن تاجىكستان اراسىنداعى اۋىل شارۋاشىلىعى ونىمدەرىنىڭ تاۋار اينالىمى 500 ملن دوللاردان اسقان. بۇل جايىندا مەملەكەت باسشىسى قاسىم-جومارت توقاەۆ تاجىكستان پرەزيدەنتى ەمومالي راحمونمەن بىرلەسكەن مالىمدەمەسىندە ايتتى.

«وتكەن جىلدىڭ قورىتىندىسى بويىنشا ءبىزدىڭ ەكى ەل اراسىنداعى اۋىل شارۋاشىلىعى ونىمدەرىنىڭ تاۋار اينالىمى 40% ءوسىپ، 500 ملن دوللاردان استى. قازىرگى جاعدايدا مەن مۇنى جاقسى كورسەتكىش دەپ سانايمىن. قازاقستان تاجىكستان ءۇشىن بيداي مەن ۇن جەتكىزەتىن ءىرى سەرىكتەستەردىڭ ءبىرى بولىپ ەسەپتەلەدى. سونىمەن قاتار، بىزدە وسىمدىك مايى، ماكارون ونىمدەرى، ءسۇت ونىمدەرى، كونديتەرلىك ونىمدەر ەكسپورتىن ۇلعايتۋدىڭ قوسىمشا كوزدەرى بار. ءوز كەزەگىندە قازاقستان تاجىكستاننان جەمىس-كوكونىس ونىمدەرىن جۇيەلى تۇردە يمپورتتاۋعا مۇددەلى»، - دەدى مەملەكەت باسشىسى.

بۇگىندە قازاقستان مەن تاجىكستاننىڭ جىلدىق ساۋدا اينالىمى 1,4 ملرد دوللارعا جەتكەن.

Abai.kz