ەلىمىزدە 219 كوللەدج 624 ماماندىق بويىنشا 780 بىلىكتىلىك ليتسەنزياسىنان ايىرىلدى، دەپ حابارلايدى قر وقۋ-اعارتۋ مينيسترلىگىنىڭ ءباسپاسوز قىزمەتى.

ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ حابارلاۋىنشا، مەملەكەتتىك اتتەستاتتاۋعا دايىندىق كەزەڭىندە 219 كوللەدج 624 ماماندىق بويىنشا 780 بىلىكتىلىك ليتسەنزيالارىن قايتاردى. سونداي-اق شىعىس قازاقستان وبلىسىندا جەكە كوللەدج جابىلدى.

ايتا كەتەيىك، جىل باسىنان بەرى ەلىمىزدەگى 519 كوللەدجدە مەملەكەتتىك اتتەستاتتاۋ ءوتتى. تالداۋ ناتيجەسى بويىنشا الماتى، استانا قالاسى، قوستاناي، ماڭعىستاۋ، اتىراۋ، شىعىس قازاقستان جانە ۇلىتاۋ، اباي وبلىستارىنىڭ تەحنيكالىق جانە كاسىپتىك ءبىلىم بەرۋ ۇيىمدارىندا جاقسى كورسەتكىشتەر بايقالادى.

دەگەنمەن، ەل بويىنشا ءۇش جۇزدەن استام كوللەدج اتتەستاتتاۋدان وتپەدى. ولاردىڭ دەنى شىمكەنت قالاسى مەن پاۆلودار، قىزىلوردا وبلىستارىندا. باتىس قازاقستان، جامبىل، تۇركىستان، اقمولا جانە اقتوبە وبلىستارىندا كورسەتكىش تومەن.

«باقىلاۋ شارالارى باستالماس بۇرىن اقپاراتتىق-ءتۇسىندىرۋ جۇمىستارى جۇرگىزىلگەن بولاتىن. مەملەكەتتىك اتتەستاتتاۋ تەحنيكالىق جانە كاسىپتىك ءبىلىم بەرۋ سالاسىنداعى بىرقاتار پروبلەمالاردى انىقتاپ بەردى. قازىر استانا قالاسى، الماتى، جەتىسۋ، جامبىل جانە تۇركىستان وبلىستارىنداعى توعىز جەكە كوللەدجدىڭ قولدانىستاعى ليتسەنزياسى مەن ءبىلىم بەرۋ قىزمەتىن جۇزەگە اسىرۋعا ارنالعان ليتسەنزياعا قوسىمشالاردى قايتارۋ جۇمىسى جۇرگىزىلۋدە. بۇل كوللەدجدەر ەندى ءبىلىم بەرۋدى توقتاتادى. سونداي-اق ليتسەنزياعا قوسىمشاسى بولماسا دا ءبىلىم بەرگەن 10 كوللەدج انىقتالدى»، - دەيدى كوميتەت توراعاسى ەرنۇر داۋەنوۆ.

تالداۋ قورىتىندىسى بويىنشا جۇمىس جوسپارلارى، وقۋ جوسپارىنىڭ پاندەرى مەن مودۋلدەرى بويىنشا وقۋ باعدارلامالارى، وندىرىستىك وقىتۋ مەن كاسىپتىك تاجىريبەدەن ءوتۋ، مەملەكەتتىك جالپىعا مىندەتتى ستاندارتتىڭ تالاپتارىنا سايكەس كەلمەيتىن بازالىق، كاسىپتىك مودۋلدەردى وقىتۋ بويىنشا بۇزۋشىلىقتار انىقتالدى.

ۋاكىلەتتى ورگاندارعا تجكب ۇيىمدارىنا وقۋ جۇمىس باعدارلامالارى مەن جوسپارلارىن ازىرلەۋدە ادىستەمەلىك كومەك كورسەتۋگە قاتىستى ۇسىنىمدار بەرىلدى.

Abai.kz