پەتروپاۆلدا بۇگىننەن باستاپ جەرگىلىكتى اۋقىمدا تەحنوگەندىك سيپاتتاعى توتەنشە جاعداي رەجيمى ەنگىزىلدى.

توتەنشە جاعداي رەجيمىن ەنگىزۋگە پەتروپاۆلدا 7 مامىر كۇنى تۇتانعان ءورت سەبەپ بولدى.

ەستەرىڭىزگە سالايىق، «بەرەكە» ىقشاماۋدانىندا قامىس جانىپ، قاتتى جەلدىڭ سالدارىنان ارتى اۋقىمدى ورتكە ۇلاستى.

سالدارىنان 9 جەكە تۇرعىن ءۇي كۇلگە اينالىپ، تاعى ەكەۋىنە زاقىم كەلگەن ەدى.

پەتروپاۆل قالالىق اكىمدىگى ۇيلەرى جانىپ كەتكەن جەتى وتباسىنىڭ جالدامالى پاتەرگە ورنالاستىرىلعانىن ايتتى.

تاعى تورتەۋىنە ىڭعايلى باسپانا ىزدەستىرىلىپ جاتىر. پاتەرلەر دەمەۋشىلەردىڭ قاراجاتىنا جالعا الىنعان.

زارداپ شەككەندەرگە كومەك كورسەتۋ ءۇشىن قالا تۇرعىندارى دا اتسالىسىپ جاتىر.

پەتروپاۆلداعى قالالىق مادەنيەت ۇيىندە اشىلعان گۋمانيتارلىق پۋنكتكە تەز بۇلىنبەيتىن ازىق-تۇلىكتى، كيىم-كەشەكتى، جەكە گيگيەنالىق قۇرالداردى اپاردى.

ال توتەنشە جاعداي رەجيمى دالادا قالعان وتباسىلارعا قر زاڭناماسى اياسىندا كەلتىرىلگەن شىعىندى قىسقا مەرزىمدە وتەۋ ءۇشىن ەنگىزىلىپ وتىر.

ەندى تاۋەلسىز ساراپشىلاردىڭ باعالاۋىنان كەيىن، زارداپ شەككەندەرگە وتەماقى تولەنە باستايدى.

سونداي-اق باسپانا يەلەرىنە 100 اەك مولشەرىندە وتەماقى دا بەرىلمەك.

Abai.kz