قازاقستاننىڭ گاز سالاسىنداعى جەر قويناۋىن پايدالانۋشىلاردىڭ العاشقى فورۋمى 15 مامىردا استانا قالاسىندا ءوتتى. وسى الاڭ مۇناي-گاز سەكتورىنان 200-دەن استام قاتىسۋشىنى جانە 70 قازاقستاندىق جانە حالىقارالىق كومپانيالاردى، سونداي-اق مەملەكەتتىك ورگانداردىڭ وكىلدەرىن بىرىكتىردى.

فورۋم اياسىندا گاز ساتىپ الۋ باعاسىنىڭ جاڭا فورمۋلاسى تانىستىرىلدى، سونداي-اق قازاقستاندىق گاز ونەركاسىبىنىڭ باعا بەلگىلەۋ جانە رەنتابەلدىلىك ماسەلەلەرى تالقىلاندى. گازدى ساتىپ الۋ باعاسىنىڭ جاڭا فورمۋلاسىن ەنگىزۋ، تاۋارلىق گازدىڭ قوسىمشا رەسۋرستارىن قالىپتاستىرۋ ءۇشىن كاتاليزاتور بولادى دەپ كۇتىلۋدە.

«QazaqGaz-دىڭ باستى مىندەتتەرىنىڭ ءبىرى – گەولوگيالىق بارلاۋدان باستاپ كونفوركاعا دەيىنگى بارلىق قۇن تىزبەگى بويىنشا گاز نارىعىن قالىپتاستىرۋ جانە ىنتالاندىرۋ. ءبىز QazaqGaz-دى قازاقستاننىڭ گاز سالاسىنىڭ وڭ وزگەرىستەرىنىڭ كاتاليزاتورى جانە ەلدىڭ گاز الەۋەتىن بارىنشا ارتتىراتىن تيىمدىلىگى جوعارى ويىنشى رەتىندە كورەمىز»، - دەپ اتاپ ءوتتى «QazaqGaz» ۇك» اق-نىڭ باسقارما توراعاسى سانجار جاركەشوۆ.

بۇدان باسقا، فورۋمدى ۇيىمداستىرۋشى QazaqGaz كومپانياسى 30 جۋىق جەر قويناۋىن پايدالانۋشى كومپانيامەن قوسىمشا گاز كولەمىن ساتى پالۋ بويىنشا وفتەيك كەلىسىمدەرگە قول قويدى. ولاردىڭ قاتارىندا CNPC-اقتوبەمۇناي، قازگەرمۇناي، قازاقويل اقتوبە، جايىكمۇناي جانە ت.ب بار. كەلىسىم اياسىندا جەر قويناۋىن پايدالانۋشىلار ءوز ەسەپتەرىنەن يگەرىلىپ جاتقان كەن ورىندارىندا گاز قورىن يگەرۋدى ۇلعايتۋ كوزدەلگەن. ءوز كەزەگىندە QazaqGaz گازدى ىنتالاندىرۋ باعامەن ساتىپ الادى.

«بۇگىندە گازدىڭ ورتاشا باعاسى 1000 تەكشە مەترىنە 40-50 دوللاردى قۇرايدى. جاڭا فورمۋلانىڭ كومەگىمەن جاڭا باعانى مينيمۋم 110-120 دوللارعا جەتكىزۋدى كوزدەپ وتىرمىز. وسىلايشا، جاڭا فورمۋلا گازدى 2-2,5 ەسە قىمبات ساتۋعا مۇمكىندىك بەرەدى. بۇل ءوز كەزەگىندە، گەولوگيالىق بارلاۋ مەن گاز قورىن يگەرۋگە جاقسى جول اشادى»، – دەدى ەنەرگەتيكا ۆيتسە-ءمينيسترى اسحات حاسەنوۆ.

بۇعان دەيىن 2022 جىلعى 30 جەلتوقساندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا قول قويدى. قول قويىلعان زاڭ جوباسى شەڭبەرىندە جەر قويناۋىن پايدالانۋشىلاردان گاز ساتىپ الۋ باعاسىنىڭ ىنتالاندىرۋشى فورمۋلاسىن قولدانۋ كوزدەلگەن.

Abai.kz