ولاردىڭ سوزىنشە، جۇمىسقا ورنالاستىرۋ مەن بىردەي جالاقى تۋرالى تالاپ ءالى ورىندالماعان. "قازىر جاڭاوزەندە "وزەنمۇنايگازدىڭ" الدىندا ەرەۋىلدەپ تۇرمىز. بۇرىن ىستەگەن "بەرالى" كومپانياسى جۇمىسقا شاقىرىپ جاتىر. وعان جۇمىسقا بارعىمىز كەلمەيدى. سەبەبى، وندا جۇمىس تۇراقسىز", - دەيدى ەرەۋىلدەۋشىلەردىڭ ءبىرى ەربول جانباەۆ.
14 مامىر كۇنى جەرگىلىكتى باق "بەرالى ماڭعىستاۋ Company" جۇمىسشىلارىنىڭ جۇمىس ورنىنا ورالعانىن حابارلاعان. كومپانيا باسشىسى 80 ادام جۇمىسقا ورنالاستى دەگەن.
ء"بىز بۇرىنعى جۇمىسشىلارىمىزعا قامقورلىق جاسايمىز. ولاردىڭ قۇقىعىن قۇرمەتتەيمىز جانە پىكىرىمەن ساناسامىز. جۇمىس ءبىر ايدان كوپ ۋاقىتقا توقتاتىلدى. كوپتەگەن كەلىسسوزدەر بولدى", - دەگەن "بەرالى ماڭعىستاۋ Company" جشس ديرەكتورى ەرلان جۇزباەۆ.
"بەرالى" ديرەكتورىنىڭ بۇل سوزىمەن ەرەۋىلدەپ تۇرعان مۇنايشىلار كەلىسپەيدى. ولار بۇل جۇمىسقا بۇرىنعى جۇمىسشىلاردى شاقىرىپ العانىن، ولارمەن بىرگە تەندەردەن ۇتىپ العان ۇڭعىمالاردى جويۋ جۇمىسىن باستاۋعا تىرىسىپ جاتقانىن ايتادى. بۇل ماسەلەگە قاتىستى كومپانيا باسشىلارى جۋرناليستەرگە جاۋاپ بەرمەدى.
نارازىلارمەن كەزدەسۋگە جانە "وزەنمۇنايگازدى" تەكسەرۋگە بارعان كوميسسيا مۇشەسى، "قازمۇنايگاز" ۇك باسقارما توراعاسىنىڭ ورىنباسارى داۋلەتجان حاسانوۆتىڭ سوزىنشە، ارىز-شاعىمداردى تەكسەرۋ ءالى جالعاسىپ جاتىر.
Abai.kz
