ءوز باسىما ءىس تۇسكەنگە دەيىن، قۇقىق قورعاۋ ورگاندارىنىڭ ادىلەتسىزدىگى تۋرالى ايتىلعان، جازىلعاندارعا كوپ سەنە بەرمەۋشى ەدىم. وتكەن جىلدىڭ قاڭتارىندا كوزىمنىڭ اعى مەن قاراسىنداي بولعان، ەرتەڭىنەن ۇلكەن ءۇمىت كۇتىپ وتىرعان ۇلىم كىسى  قولىنان قازا تاپقاننان كەيىنگى شىندىق ىزدەگەن شىرعالاڭىم بارىسىندا قۇقىق قورعاۋ ورگاندارىنىڭ، ونىڭ ىشىندە ىشكى ىستەر سالاسى مەن زاڭدىلىقتى قاداعالايتىن نەگىزگى ورگان - پروكۋراتۋرانىڭ  سەلقوستىعى مەن بىلايعى ادامعا دا انىق بايقالىپ تۇرعان ايعاقتار مەن دالەلدەردى كورمەي قالاتىندىعىنا كوزىم ابدەن جەتتى. العاشقى كەزدە: «بالاڭىزدى ولتىرگەندەردى دەرەۋ ۇستايمىز، بارلىعى انىق. تەلەفونىڭىز بىزدە  بار. ءوزىمىز حابارلاسامىز» دەپ شىعارىپ سالعان تالدىقورعان قالالىق ءىىب تەرگەۋشىسى م. بالابەكوۆ 212 جىلدىڭ 24 قاڭتارىندا قر قك-ءنىڭ 96-بابىنىڭ 1-تارماعىمەن قىلمىستىق ءىس قوزعاعان ەدى. كۇدىكتى رەتىندە انىقتالعان اباي قوجابەك تە ۇستالىپ، ۋاقىتشا وقشاۋلاۋ ورنىنا قامالعان بولاتىن. الايدا، ول ەكى كۇننەن سوڭ بوساتىلىپ، تەرگەۋ بارىسىندا ەكى رەت توقتامعا الىنىپ، قايتا جاڭعىرتىلعان قىلمىستىق ءىس اقىرى قىسقارتىلىپ تىندى. ناقتىراق ايتقاندا، 2012 جىلدىڭ 14 تامىزىندا جوعارىداعى م. بالابەكوۆ قر قىجك-ءنىڭ 50-بابىنىڭ 1-تارماعىنداعى 2-تارماقشاعا ساي قىلمىستىق ءىستى وندىرىسپەن قىسقارتىپ جىبەردى.

ءوز باسىما ءىس تۇسكەنگە دەيىن، قۇقىق قورعاۋ ورگاندارىنىڭ ادىلەتسىزدىگى تۋرالى ايتىلعان، جازىلعاندارعا كوپ سەنە بەرمەۋشى ەدىم. وتكەن جىلدىڭ قاڭتارىندا كوزىمنىڭ اعى مەن قاراسىنداي بولعان، ەرتەڭىنەن ۇلكەن ءۇمىت كۇتىپ وتىرعان ۇلىم كىسى  قولىنان قازا تاپقاننان كەيىنگى شىندىق ىزدەگەن شىرعالاڭىم بارىسىندا قۇقىق قورعاۋ ورگاندارىنىڭ، ونىڭ ىشىندە ىشكى ىستەر سالاسى مەن زاڭدىلىقتى قاداعالايتىن نەگىزگى ورگان - پروكۋراتۋرانىڭ  سەلقوستىعى مەن بىلايعى ادامعا دا انىق بايقالىپ تۇرعان ايعاقتار مەن دالەلدەردى كورمەي قالاتىندىعىنا كوزىم ابدەن جەتتى. العاشقى كەزدە: «بالاڭىزدى ولتىرگەندەردى دەرەۋ ۇستايمىز، بارلىعى انىق. تەلەفونىڭىز بىزدە  بار. ءوزىمىز حابارلاسامىز» دەپ شىعارىپ سالعان تالدىقورعان قالالىق ءىىب تەرگەۋشىسى م. بالابەكوۆ 212 جىلدىڭ 24 قاڭتارىندا قر قك-ءنىڭ 96-بابىنىڭ 1-تارماعىمەن قىلمىستىق ءىس قوزعاعان ەدى. كۇدىكتى رەتىندە انىقتالعان اباي قوجابەك تە ۇستالىپ، ۋاقىتشا وقشاۋلاۋ ورنىنا قامالعان بولاتىن. الايدا، ول ەكى كۇننەن سوڭ بوساتىلىپ، تەرگەۋ بارىسىندا ەكى رەت توقتامعا الىنىپ، قايتا جاڭعىرتىلعان قىلمىستىق ءىس اقىرى قىسقارتىلىپ تىندى. ناقتىراق ايتقاندا، 2012 جىلدىڭ 14 تامىزىندا جوعارىداعى م. بالابەكوۆ قر قىجك-ءنىڭ 50-بابىنىڭ 1-تارماعىنداعى 2-تارماقشاعا ساي قىلمىستىق ءىستى وندىرىسپەن قىسقارتىپ جىبەردى.

تالدىقورعان قالالىق پروكۋراتۋراسىنا شاعىمداندىم. 27 تامىزدا قالالىق پروكۋراتۋرانىڭ ءبولىم باستىعى ا. جۇماعۇلوۆ ىشكى ىستەر باسقارماسى تەرگەۋشىسىنىڭ قىلمىستىق ءىستى وندىرىسپەن قىسقارتۋ جونىندەگى قاۋلىسىن نەگىزسىز دەپ بۇزىپ، ءىستى وبلىستىق  پوليتسياعا قايتا تەرگەۋگە جونەلتتى.

31 تامىز كۇنى قىلمىستىق ءىستى الماتى وبلىستىق ءىىد تەرگەۋ باسقارماسىنىڭ اعا تەرگەۋشىسى م. جاناتۇلى ءوز وندىرىسىنە قابىلداعاندا، ادىلدىك سالتانات قۇراتىن بولدى دەپ ۇمىتتەنگەن  ەدىم. الايدا، ونىم ۇزاققا سوزىلمادى. اراعا اپتا عانا سالعان م. جاناتۇلى قىلمىستىق ءىستى قىلمىس قۇرامى جوقتىعىنا بايلانىستى دەپ وندىرىسپەن ەكىنشى مارتە قىسقارتتى. سول 2012 جىلدىڭ 11 قازانى كۇنى قر باس پروكۋرورىنىڭ ورىنباسارى ن. يساەۆ اعا تەرگەۋىشى ا. جاناتۇلىنىڭ شەشىمىن زاڭدى دەپ تاپتى.

مەن ولاردىڭ بىردە-ءبىر شەشىمىمەن كەلىسپەيتىنىمدى ايتىپ، تالدىقورعان قالالىق سوتىنا شاعىممەن  شىقتىم.  قالالىق سوتتىڭ سۋدياسى ا. اەنوۆ ءىستى اق-قاراسىن ايىرا وتىرىپ قاراپ، بۇگە-شىگەسىنە دەيىن تەكسەردى جانە مەنىڭ بولجامىمنىڭ اقيقات ەكەندىگىن انىقتادى. سوت بارىسىندا پوليتسيا قىزمەتكەرلەرىنىڭ شالاعايلىعىمەن بىرگە تەرگەۋشىلەردىڭ جالتاقتىعى جانە  بىلىمسىزدىگى انىق بايقالادى.

وسى سوزدەرىم ناقتى بولۋ ءۇشىن تالدىقورعان قالالىق سوتىنىڭ سۋدياسى ا. اەنوۆتىڭ 2012 جىلى 10 جەلتوقساندا قىلمىستىق ءىستىڭ قىسقارتىلۋىمەن كەلىسپەيتىندىگىمدى بىلدىرگەن مەنىڭ شاعىمىمدى قاناعاتتاندىرۋ تۋرالى شىعارعان قاۋلىسىنان ۇزىندىلەر كەلتىرە كەتكەندى ءجون كورىپ وتىرمىن.

2012 جىلدىڭ 23 قاڭتارىندا تالدىقورعان قالاسىنداعى «جەتىسۋ» شاعىن اۋدانى ماڭىنداعى جيحازدار دۇكەنىنىڭ قاسىندا ەكى جىگىت: وقيعا ورنىندا قازا تاپقان  ايبەك  سەيسەكەنوۆ پەن ونىڭ ولىمىنە سەبەپكەر بولدى  دەگەن كۇدىكتى  اباي قوجابەك وزدەرىنىڭ  ورتاق تانىستارى الۋا داكاريەۆاعا قاتىستى تۇسىنبەستىكتى تارقاتۋ ءۇشىن جولىعادى. سول جەردە ەكى جىگىت اراسىندا قاقتىعىس تۋىنداپ، ا. سەيسەكەنوۆ پىشاققا ءتۇسىپ، ءۇستى-باسى قانعا بويالىپ، سول جەردە قالعان. ال  ا. قوجابەك پەن ا. داكاريەۆا دەرەۋ تاكسيگە وتىرىپ، الماتىعا قاشىپ كەتەدى دە سول جاقتا جاسىرىنىپ جاتىپ، وقيعانىڭ بەتالىسىن باقىلايدى. ارتىنان انىقتالعانداي، ا. سەيسەكەنوۆتىڭ سول جاق بۇعاناسىنان تومەنگە قاراي باعىتتالعان اسا قۋاتتى سوققىدان كەيىن 15 سانتيمەتر تەرەڭدىككە دەيىن ەنىپ كەتكەن پىشاقتىڭ ءجۇزى قولتىق تۇستاعى كۇرەتامىردى قيىپ كەتكەن. ول دەر كەزىندە مەديتسينالىق كومەك كورسەتىلمەگەندىكتەن، سول جەردە  قانسىراپ قايتىس بولعان. تەرگەۋشى بالابەكوۆ سوتتا كۇدىكتىلەردىڭ وقيعا ورنىنان قاشىپ كەتكەندىگىنە جانە كيىمدەرىنە جۇققان قاندى جۋىپ تاستاعاندارىنا قاراماستان، ا. داكاريەۆانىڭ كۇرتەشەسىنىڭ ەكى جەڭىنە جۇققان قان داقتارى كورىنىپ تۇرعانىن، بىراق كۇدىكتى مەن جابەرلەنۋشىنىڭ قاندارىنىڭ قۇرامى بىرگە بولعاندىقتان ونى سوت-دارىگەرلىك ساراپتاماعا جىبەرمەگەنىن ايتادى. پىشاقتى تاپپاعان، كۇدىكتىلەردى الماتىعا الىپ كەتكەن تاكسيستى دە ىزدەمەگەن، سەزىكتىلەر توقتاعان قوناقۇي قىزمەتكەرلەرىنەن سۇراۋ الماعان. جانە سوت وتىرىسى بارىسىندا بۇلاردى جاسىرمايدى. سونىمەن بىرگە ا. قوجابەكتىڭ پىشاقپەن جۇرەتىنى جانە داكاريەۆاعا ۇيالى تەلەفونمەن حابارلاسىپ، «ولتىرەمىن» دەپ قورقىتقانى، تاعى دا باسقالاي قوقان-لوقى جاساعانىنا قاتىستى انىقتالعان دەرەكتەر دە ىسكە تىگىلمەپتى. تەرگەۋشى كۇدىكتىلەردىڭ وزدەرىن اقتاپ سويلەگەندەرىن عانا باسشىلىققا الادى. ولاردىڭ سەيسەكەنوۆتىڭ قوجابەككە پىشاق الا جۇگىرگەنىن جانە داكاريەۆانىڭ كەدەرگى بولۋىنان سوڭ جىعىلىپ، قولىنداعى پىشاققا قۇلاعانى تۋرالى مالىمدەمەلەرىنە عانا سۇيەنەدى. مۇندا قۇلاعان جاننىڭ قولىنداعى پىشاقتىڭ ارى كەتكەندە كەۋدە تۇسقا كىرەتىنى، ال سەيسەكەنوۆكە پىشاقتىڭ سو جاق شىقشىتتى جانامالاي، بۇعانادان تومەن قاراي سۇعىلعانى مۇلدە ەسكەرىلمەي قالعان. داكاريەۆانىڭ  سىرتقى كيىمىنىڭ ەكى شىنتاعىنا دەيىن قان بولعانى جانە ونى الماتىعى بارعاندا جۋىپ تاستادىم دەگەنى دە ەلەنبەگەن. ونىڭ جەڭدەرىنىڭ قانعا قانداي جاعدايدا مالشىنعانى دا زەردەلەنبەگەن. بۇدان باسقا دا  تەرگەۋ تالاپتارى جۇزەگە اسىرىلماعان. توق ەتەرىن ايتقاندا، ءىستى تەزىرەك قىسقارتىپ، قۇتىلۋدى عانا ويلاعان.

وتكەن جىلدىڭ تامىزىنىڭ سوڭىنا تامان قالالىق پروكۋراتۋرا كەرى قايتارعان قىلمىستىق ءىستى وندىرىسكە  قابىلداپ العان وبلىستىق ءىىد اعا تەرگەۋشىسى ا. جاناتۇلى بولسا، قالالىق ءىىب ارىپتەسى بالابەكوۆتىڭ وزىنە دەيىن العان جاۋاپتارىن ءۇتىر،  نۇكتەسىنە دە قالدىرماي كوشىرىپ، قولىن قويىپ، ىسكە تىگە سالادى. پروكۋراتۋرا تاراپىنان قوسىمشا ساراپتامالار تاعايىنداۋ، سوت-كريمناليستىك ساراپتاما جۇرگىزۋ جونىندە جۇكتەلگەن تاپسىرمالاردى ورىنداماعان.سوت كەزىندە ءوزىنىڭ وسىناۋ جاۋاپسىز ءارى ءجونسىز ارەكەتىن: «قازاقشا دۇرىس بىلمەگەندىكتەن، بالابەكوۆتىڭ ءىستى قىسقارتۋ تۋرالى قاۋلىسىن كوشىرىپ باسىپ، قول قويا سالدىم» دەۋىن جاۋاپسىزدىق دەۋدەن گورى لاۋازىمدىق قىلمىس دەسەك دۇرىس بولادى. وسىلايشا، قوس تەرگەۋشى ادام ءولتىردى دەگەن كۇدىكپەن ۇستالعان جاننىڭ جاۋاپتان جالتارۋىنا بارلىق جاعدايدى جاسايدى.

سوت بارىسىندا انىقتالعاندارعا ساي،  قر قىجك-ءنىڭ 109 جانە 325-باپتارىن باسشىلىققا العان قالالىق سوتتىڭ سۋدياسى الماتى وبلىستىق ءىىد اعا تەرگەۋشىسى م. جاناتۇلىنىڭ قىلمىستىق ءىستى قىسقارتۋ تۋرالى قاۋلىسىن زاڭسىز دەپ تانۋ جونىندەگى مەنىڭ تالابىمدى قاناعاتتاندىرىپ،  قىلمىستىق ءىستى وبلىستىق پروكۋراتۋرانىڭ ارناۋلى تەرگەۋ ورتالىعىنا الدىن الا تەرگەۋ جۇرگىزۋ ءۇشىن جونەلتۋ تۋرالى شەشىم قابىلدادى.

ارادا ءۇش كۇن وتكەندە (جەدەلدىگىن قاراساڭىزشى) 2012 جىلدىڭ 13 جەلتوقسانى كۇنى تالدىقورعان قالاسى پروكۋرورىنىڭ مىندەتىن اتقارۋشى ءى. بەسكەمپىروۆ الماتى وبلىستىق سوتىنىڭ قىلمىستىق ىستەر جونىندەگى القاسىنىنا تالدىقورعان قالالىق سوتىنىڭ سۋدياسى ا. اەنوۆتىڭ شەشىمىمەن كەلىسپەيتىندىگىن ايتىپ،  جەكە نارازىلىق جازادى. وندا ول وزدەرى انىقتاعان دەرەكتەردى كەلتىرە وتىرىپ، وبلىستىق ءىىد اعا تەرگەۋىشىسى ا. جاناتۇلىنىڭ قاۋلىسىن كۇشىندە قالدىرۋ تۋرالى ۇسىنىسىن بىلدىرەدى.

دەگەنمەن، 2012 جىلدىڭ 25 جەلتوقسانىندا سۋديا  ق. جانتاسوۆتىڭ توراعالىق ەتۋىمەن وسى جەكە نارازىلىقتى قاراعان الماتى وبلىستىق سوتىنىڭ قىلمىستىق ىستەر جونىندەگى اپەللياتسيالىق سوت القاسى تالدىقورعان قالالىق سوتىنىڭ قاۋلىسىن كۇشىندە، پروكۋروردىڭ جەكە نارازىلىعىن قاناعاتتاندىرۋسىز قالدىرادى.

كىسى ولىمىنە قاتىستى قىلمىستىق ءىستىڭ ماسەلەسى وسىمەن ءبىتتى، قىلمىستىق ءىس قايتا قوزعالدى، قىلمىسكەرلەر جازاسىن الدى  دەسەڭىز قاتتى قاتەلەسەسىز.

وتكەن جىلدىڭ 27 جەلتوقسانىندا ماعان قر باس پروكۋراتۋراسىنىڭ 2-ءشى دەپارتامەنتىنىڭ باستىعى ت. جانعاراشەۆتىڭ قول قويۋىمەن كەلگەن حاتتا: «سوت قاۋلىسىندا كەلتىرىلگەن نۇسقاۋلار مەن ءسىزدىڭ ۋاجدەرىڭىز قوسىمشا تەرگەۋ امالدارىن جۇرگىزۋ بارىسىندا ورىندالىپ، قىلمىستىق ءىس بويىنشا تۇپكىلىكتى شەشىم قابىلدانادى» دەپ جازىلعان.

وسى جىلدىڭ 28 قاڭتارىندا جوعارىدا اتالعان دەپارتامەنتتىڭ باسقارما پروكۋرورى م. ماحمەتوۆ الماتى وبلىسى پروكۋرورىنىڭ ورىنباسارى س. باكيروۆقا مەنىڭ ارىزىمدى جونەلتىپ، جان-جاقتى تەكسەرۋ جۇرگىزىپ، ءتيىستى شەشىم قابىلداۋدى تاپسىرادى جانە حاتتىڭ كوشىرمەسىن ماعان دا جىبەردى. بالامنىڭ ولىمىنە سەبەپكەر بولىپ قانا قويماي، قانسىراتىپ دالاعا تاستاپ كەتكەندەر جازاسىن الاتىن بولدى-اۋ ايتەۋىر، دەپ تاعى دا قۋانىپ قالىپ ەدىم. قىلمىستىق ءىس بۇرىنعى تاز قالپىنا قايتا ءتۇستى. ءىس باسقا تەرگەۋشى ەمەس، سول باياعى بالابەكوۆكە تۇسكەن ەكەن، ول كوپ ويلانباستان 28 اقپاندا قىلمىستىق ءىستى تاعى دا قىسقارتىپ جىبەرەدى. سول كۇنى ماعان حات جولداعان تالدىقورعان قالاسىنىڭ  پروكۋرورى ك. ۋسيپباەۆ، تەرگەۋشىنىڭ قاۋلىسىمەن كەلىسىپ وتىرعانىن، سوندىقتان ونى بۇزۋعا نەگىز جوقتىعىن جازادى. ءبىر قىزىعى ىلە-شالا - 2013 جىلدىڭ 6 ناۋرىزىندا الماتى وبلىستىق پروكۋراتۋراسىنىڭ 2-ءشى باسقارماسىنىڭ باستىعى ە. جاقسىباەۆ قول قويعان كەزەكتى سىرعىتپا جاۋاپتا: «قالالىق ءىىب تەرگەۋشىسى قابىلداعان شەشىمنىڭ قالالىق پروكۋراتۋراعا كەلىپ تۇسكەنى جانە ونىڭ زاڭدىلىعىن قالالىق پروكۋراتۋرا تەكسەرىپ جاتقانى» جازىلادى. وسى ەكى جاۋاپقا قاراپ وتىرىپ قايران قالامىن. ارالارىندا ءۇي جوق، كورشىلەس وتىرعان قالالىق جانە وبلىستىق پروكۋراتۋراداعىلار  ءبىر ءىس بويىنشا ءبىر ءبىرىنىڭ نە شارا قولدانىپ وتىرعانىن بىلمەيتىندەي كورىنەدى ماعان. ويتكەنى، وبلىستىق پروكۋراتۋرانىڭ ءىس بويىنشا ارىز قالالىق پروكۋراتۋراعا كەلىپ ءتۇستى جانە تەكسەرىلەدى  دەگەن جاۋابى، قالالىق پروكۋراتۋرانىڭ تەرگەۋشى شەشىمىمەن كەلىسەتىندىگى تۋرالى حاتىنا قول قويىلعاننان ءبىر اپتا وتكەننەن كەيىن جازىلىپتى. وسىلايشا، وبلىستىق پروكۋراتۋرا ءىستى تەكسەرۋ باستالدى دەسە، قالالىق پروكۋراتۋرا ودان ءبىر اپتا بۇرىن ءىستىڭ قىسقارتىلۋىن ماقۇلداعانىن ايتادى. كورىپ وتىرعاندارىڭىزداي، كوپە-كورنەۋ جونسىزدىك. تەك شىعارىپ سالما جازۋدى عانا مەڭگەرگەندەر تەرگەۋ مەن تەكسەرۋگە كوڭىل بولمەيدى. سول باياعى بالابەكوۆتىڭ 2012 جىلدىڭ تامىزىندا ءىستى قىسقارتۋعا قاتىستى تولتىرعان قاۋلىسى تاعى دا سول بويىنشا قايتالانىپ، الدىدان شىعادى.

اراعا ءبىر ايعا جۋىق ۋاقىت سالىپ بارىپ، ياعني، 2013 جىلدىڭ 2 ساۋىرىندە تالدىقورعان قالاسى پروكۋرورىنىڭ مىندەتىن اتقارۋشى ءى. بەسكەمپىروۆ تاعى دا حات جولداپ، تەرگەۋشى بالابەكوۆتىڭ شەشىمىمەن قالالىق پروكۋراتۋرانىڭ كەلىسكەنىن جانە ونى بۇزۋعا نەگىز جوقتىعىن قايتالاي حابارلادى.

وسىلايشا، ءالى كۇنگە اۋرە-سارساڭعا تۇۋدەمىن. بالامدى ۇيدەن ۇيالى تەلەفونمەن شاقىرىپ الىپ، اقىرى ءولتىرىپ تىنعان اباي قوجابەك پەن وسى قاندى قىلمىسقا باستى سەبەپكەر ءارى قاتىسۋشى بولىپ تابىلاتىن الۋا داكاريەۆا بوستاندىقتا تايراڭداپ ءجۇر. ال تەرگەۋشىلەر قايتا-قايتا قىلمىستىق ءىس قوزعاۋدان باس تارتىپ، پروكۋرورلار ولاردى ماقۇلداۋدى جالعاستىرىپ وتىر. قالالىق سوت پەن الماتى وبلىستىق سوتىنىڭ قىلمىستىق ىستەر جونىندەگى اپەللياتسيالىق سوت القاسى شىعارعان، تەرگەۋشىلەردىڭ قاۋلىلارىن بۇزاتىن جانە قىلمىستىق ءىستى قايتا تەرگەۋ تۋرالى شەشىمدەرى ورىندالار ەمەس، نازاردان مۇلدە تىسقارى قالۋدا. وقيعانىڭ باستى سەبەپكەرلەرىنىڭ ءارى كۇدىكتىلەرىنىڭ پىشاقتالعان بالامدى سول جەرگە قانسىراتىپ تاستاپ، دەرەۋ الماتىعا قاشىپ كەتكەندىكتەرى قىلمىس ەكەنىن ايتپاعاندا، ادامگەرشىلىككە تە جاتپايدى عوي. ولار سول ارادا دەرەۋ كومەك كورسەتكەندە ۇلىمنىڭ ءتىرى قالۋى دا مۇمكىن ەدى. قالاي بولعاندا دا، قالالىق سوت پەن وبلىستىق سوتتىڭ اپەللياتسيالىق القاسى شىعارعان ءادىل شەشىمدەردە ايتىلعان، ەسكەرتىلگەن كەمشىلىكتەر مەن كەلەڭسىزدىكتەردىڭ بىردە-ءبىرى ورىندالمادى جانە تۇزەتىلمەدى. تەرگەۋشىلەر، سول اعاشقى قاۋلىلارىن قايتا-قايتا كوشىرىپ بەرىپ،  ولارىن پروكۋرورلارعا قۇپتاتىپ قانا وتىر. وسىعان وراي قر باس پروكۋراتۋراسىنىڭ جانە قر ىشكى ىستەر مينيسترلىگىنىڭ اتالعان جاعدايعا شۇعىل ءارى شەشىمدى تۇردە نازار اۋدارىپ، كۇدىكتىلەردگە قاتىستى قوزعالعان قىلمىستى ءىستىڭ اياعىنا دەيىن جەتكىزۋگە ىقپال ەتۋىن تالاپ ەتەمىن.

بەكتەسىن سەيسەكەنوۆا،

تالدىقورعان قالاسىنىڭ تۇرعىنى

الماتى وبلىسى.

Abai.kz