الاش اراداگەرلەرىنىڭ تۋعان توپىراعى - كيەلى تورعاي دالاسىنداعى ارقالىق قالاسىنا 2012 جىلى مامىر ايىندا بەرىك ابدىعاليۇلى اكىم بولىپ تاعايىندالعان ەدى. تورعاي وبلىسى بۇرىندا قوستانايعا قوسىلىپ، قايتا ءبولىنىپ ءارى-ءسارى كۇي كەشىپ كەلگەن ەدى. 1995 جىلعى وپتيميزاتسيا تۇسىندا تورعاي تاعى دا قوستانايدىڭ قولتىعىنا كىرىپ تىندى. سودان بەرى ارقالىق قالاسى مەن  اۋدان ورتالىقتارى، قيان شەتتەگى اۋىلدار كورمەگەندى كورىپ،  تاۋقىمەت تارتۋمەن كەلەدى. تەك ارقالىقتىڭ عانا سوڭعى بىرەر جىلدا اجارى قايتا كىرە باستاعان سياقتى. قالاعا بەرىك ابدىعاليۇلى بارىسىمەن ءتىپتى جاندانىپ، قۇلپىرىپ، ءتۇتىنى ءتۇزۋ ۇشىپ، ءوزىنىڭ الەۋەتتى شاھار ەكەندىگىن ايگىلەي باستاعان. ىسكەر، مەملەكەتشىل تۇلعا بەرىك مىرزا ارقالىق حالقىن باۋراپ الدى. كوڭىلدەرىن بىرلەندىرىپ تولاعاي ەڭبەك ەتتى. الايدا بىزدەگى حالىقشىل ازاماتتاردىڭ پارمەندى قىزمەتتە كوپ وتىرا المايتىن «سالتىمەن» بەرىك ابدىعاليۇلى دا ءمىنايى سەبەپتەرمەن  ارقالىق قالاسى اكىمىنىڭ كەڭسەسىنەن شىعىپ قالدى. قازىر التىن باستى ازاماتىمىز قىزمەتسىز بوس ءجۇر. ول ءسىرا، كاسىپ-قاراكەتسىز قالا قويماس. بالا-شاعاسىنىڭ دا قارىنىن اش قالدىرماس. بىراق ارقالىقتىڭ كۇرەتامىرىنا قان جۇگىرتىپ جىگەرلەنە جۇمىس جاساعان جاقسى اكىم ەندى قايتىپ ورالا ما، جوق پا؟ جۇرت سوعان الاڭداۋلى. ارقالىق جۇرتى سونى ويلاپ مۇڭايادى. مىنا ءبىر توي-سالتاناتتا ورىندالاتىن ءان (ۆيدەونى قاراڭىز) «اق بەرىك» دەپ اتالىپتى. بەلگىلى انگە ءسوز جازىپ ورىنداعان ى. التىنسارين اتىنداگى اركالىك مەملەكەتتيك پەداگوگيكالىك ينستيتۋتى،فيلولوگيا فاكۋلتەتىنىڭ 2 كۋرس ستۋدەنتتەرى ەكەن. ستۋدەنتتەر دەگەن - قالانىڭ ەڭ سەزىمتال ءام سەرگەك  تۇرعىندارى. ولار ءوز قالاسىنىڭ ناعىز پاتريوتتارى. ەندەشە  بەرىك اعالارىن قيا الماي قينالعان ستۋدەنتتەرىن ءانىن تىڭداپ كورەيىك.

Abai.kz

بەرىك ابدىعاليۇلى

• 1997 جىلدىڭ قاراشاسىنان - قر اقپارات جانە قوعامدىق كەلىسىم مينيسترلىگى تالداۋ، جوسپارلاۋ جانە رەفورمالاردى ناسيحاتتاۋ باسقارماسىنىڭ باستىعى (اقمولا).
• 1998 جىلدان - قر مادەنيەت، اقپارات جانە قوعامدىق كەلىسىم مينيسترلىگى ىشكى ساياسات دەپارتامەنتى ديرەكتورىنىڭ ورىنباسارى (استانا).
• 1999 جىلدان - قر قاۋىپسىزدىك كەڭەسى تالداۋ ورتالىعى موڭگەرۋشىسىنىڭ ورىنباسارى (استانا).
• 2000 جىلدان - قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ءبىرىنشى ورىنباسارى (استانا).
• 2001 جىلدان - تەمىرتاۋ قالاسى اكىمىنىڭ ورىنباسارى.
• 2002 جىلدان - ۇلتتىق زەرتتەۋلەر ينستيتۋتىنىڭ ديرەكتورى (الماتى).
• 2003 جىلدان - «اق جول» قدپ ورتالىق اپپاراتى جەتەكشىسىنىڭ ورىنباسارى، ءبىرىنشى ورىنباسارى (الماتى).
• 2004 جىلدان - «ساياسي ءبىلىم بەرۋ قورى» قوعامدىق قورىنىڭ پرەزيدەنتى (الماتى).
• 2005 جىلدان - «اتامەكەن» قازاقستاننىڭ كاسىپكەرلەرى مەن جۇمىس بەرۋشىلەرىنىڭ جالپىۇلتتىق وداعى» زتب اتقارۋشى ديرەكتورىنىڭ كەڭەسشىسى (استانا).
• 2006 جىلدان - «اتامەكەن» ۇلتتىق دامۋ ورتالىعى» جشس ديرەكتورى (استانا).
• 2007 جىلدان - قر پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعىنىڭ باس ينسپەكتورى (استانا).
• 2008 جىلدىڭ ناۋرىزىنان - قر پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى (استانا).
• 2008 جىلدىڭ قازانىنان - پرەزيدەنتتىڭ مەملەكەتتىك ءتىلدى دامىتۋ قورىنىڭ ديرەكتورى (استانا).
• 2010 جىلدىڭ قاڭتارىنان - قاراعاندى وبلىسى ۇلىتاۋ اۋدانىنىڭ اكىمى