بىزدە 176 سپورتتىق فەدەراتسيا بار. بارلىعى رەسمي تىركەلگەن. بارلىعى مەملەكەتتىك قولداۋدى الادى. 19 ميلليون حالقى بار قازاقستان ءۇشىن بۇل تىم ۇلكەن كورسەتكىش. ءيا، تىم ۇلكەن. سول از حالقىمىزدىڭ ءوزى تۇگەلدەي سپورتپەن شۇعىلدانبايدى عوي. كىشكەنتاي بولىگى عانا. بىراق، سپورت ءتۇرى وتە كوپ.

نەگە؟ ويتكەنى، سپورت سالاسىندا اعىل دا تەگىل اقشا بار. كىم كورىنگەن قولىن سۇعىپ، قالاعانىن الا بەرەدى. الا بەرگەندە، الۋعا تىرىسادى. سوندىقتان، قايداعى جوق فەدەراتسيالاردى اشىپ تاستاپ، سول ارقىلى قالتالارىن قامپيتىپ جاتىر.

سانامالاپ كوردىم. سول 176 فەدەراتسيانىڭ 46-سى جازعى وليمپيادالىق، 13-ءى قىسقى وليمپيادالىق باعىت. وك. وعان اقشا بولۋگە بولادى. ودان كەيىن وليمپيادالىق ەمەستىڭ دە ءتۇر-ءتۇرى بار. ونىڭ ىشىندە شامامەن 20-سى قولداۋ جاساۋعا تۇرارلىق دەلىك. بۇل – مەنىڭ جەكە پىكىرىم. قاتەلەسۋىم دە مۇمكىن.

ەڭ ماسقاراسى مىنادا. قالعان سپورتتىق باعىتتار ءبىز ءۇشىن ناحرەن نە نۋجەن. مىسالى، پيلونداعى سپورت دەگەندى ەستىدىڭىز بە؟ اتىن ادەمى قىلىپ قويعان. ال، زاتى – كادىمگى ستريپتيز. تەمىرگە ورتالىپ بيلەۋدى ۇيرەتەدى. قاي-قاي جاعىنان دا مەنتاليتەتىمىزگە جات. وسىعان مەملەكەتتەن قولداۋ جاسالادى.

يندونەزيانىڭ پەنچاك سيلاتى، قىتايدىڭ ۋشۋى، تاتاردىڭ بەلبەۋ كۇرەسى... ولار بىزگە كەرەك پە؟ باسقا حالىقتاردىڭ ۇلتتىق سپورتىنا نەگە ءبىزدىڭ حالىقتىڭ اۋزىن جىرىپ تۇرىپ اقشا ءبولۋىمىز كەرەك؟ ولاردىڭ تاريحىن، ولاردىڭ ءداستۇرىن، ولاردىڭ فيلوسوفياسىن، ولاردىڭ ۇستانىمىن نەگە ءبىزدىڭ بالالار ۇيرەنۋى كەرەك؟ نەگە بويلارىنا ءسىڭىرۋ كەرەك؟

ودان كەيىن سپورتتىق بالىق اۋلاۋ دەگەن نە؟ تاعى دا اتى كۇشتى. ال، نەگىزى سپورت ەمەس، ساۋىق قوي. كايف. بالىق اۋلىپ وتىراسىڭ. سونى رەسمي اكرەديتتەپ، مەملەكەت قولداۋ جاسايدى. وسىلاي-وسىلاي كەتە بەرەدى. وسىندايدىڭ ءالى قانشاسى قازىر تىركەلۋدە جانە ءالى قانشاسى تىركەلەدى؟! ەشكىم بىلمەيدى.

بەلگىلىسى – ولار ءبارىن زاڭمەن بەكىتىپ، ەلدىڭ موينىنا پلوتنو وتىرىپ العان. ونى وزگەرتۋگە جول بەرمەيدى. ارتىندا ۇلكەن ادامدار تۇر. ۇلكەن مۇددەلەر تۇر. جان-جاقتان جالماڭداپ كەلىپ، حالىقتىڭ اۋزىن ۇرىپ جاتىر. ەگەر وسىنى جاقىن ارادا نىقتاپ قولعا الىپ، توسقاۋىل قويماساق، قارجىلاندىرۋدى تىيماساق، تايراڭداۋىن توقتاتپاساق، ءوز ۇرپاعىمىزدى ءوز قولىمىزبەن ولتىرەمىز. ۇلت رەتىندە جويىلۋىمىز باسقادان ەمەس، ءدال وسى تىرناقشانىڭ ىشىندەگى سپورتتاردان بولادى...

اسىلان قاجەنوۆ

Abai.kz