قازاقستان بيلىگى رەسەيگە تىيىم سالىنعان تاۋارلاردىڭ ەكسپورتتاۋ دەرەگىن ءالى انىقتاعان جوق. بۇل تۋرالى قر قارجى ءمينيسترى ەرۇلان جاماۋباەۆ مالىمدەدى، دەپ حابارلايدى Ulysmedia.kz.

بۇعان دەيىن باق بەتتەرىندە قازاقستاندىق كومپانيا سالىنعان سانتسيالاردى ايلانىپ ءوتىپ، رەسەيگە چيپتەر مەن دروندار تاسىمالداپ جاتىر دەگەن اقپارات تاراعان بولاتىن.

«مەن قازىر قانداي كومپانيا تۋرالى ايتىپ وتىرعانىڭىزدى بىلمەيمىن. بىراق، قازىر بىزدە تاۋەكەلدەردى باسقارۋدىڭ ناقتى جۇيەسى بار. ءبىز قايتالاما سانكتسيالارعا جول بەرمەيمىز. ونىڭ ىشىندە سوعىس قيمىلدارىن ۋشىقتىراتىن تاۋار تۇرلەرى دە بار. تسيفرلاردى قاراڭىز، وندا ميللياردتاعان دوللار جوق، مۇمكىن بىرنەشە ميلليون دوللارعا ەكسپورتتىق وپەراتسيالار بولعان شىعار، بىراق ءبىز تاۋەكەلدەردى باسقارۋ جۇيەسى ارقىلى بۇعان جول بەرمەيمىز جانە بۇقارالىق اقپارات قۇرالدارىندا ايتىلعان كومپانيالاردىڭ تىيىم سالىنعان تاۋارلاردى ەكسپورتتاۋ دەرەگىن ءالى انىقتاعان جوقپىز»، - دەدى ەرۇلان جاماۋباەۆ.

ەسكە سالا كەتەيىك، بۇعان دەيىن “ۆاجنىە يستوري” باسىلىمى سىبايلاس جەمقورلىق پەن ۇيىمداسقان قىلمىستى زەرتتەۋ ورتالىعىمەن (OCCRP) جانە Der Spiegel نەمىس جۋرنالىمەن بىرلەسىپ، رەسەيدىڭ ۋكرايناداعى سوعىسقا قاجەتتى چيپتەر مەن درونداردى قازاقستان ارقىلى الۋىنا قاتىستى زەرتتەۋ جاريالادى.

وتكەن اپتادا وسى جاڭالىققا قاتىستى پىكىر بىلدىرگەن جاماۋباەۆ تىيىم سالىنعان تاۋارلار انىقتالسا، قاجەتتى شارالاردى قابىلداناتىنىن ايتقان.

سۋرەت: primeminister.kz

Abai.kz