قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ەلىمىزگە رەسمي ساپارمەن كەلگەن كورەيا رەسپۋبليكاسىنىڭ سىرتقى ىستەر ءمينيسترى پاك جينمەن ەكىجاقتى كەلىسسوزەر جۇرگىزدى.

تاراپتار ساياسي، ساۋدا-ەكونوميكالىق جانە مادەني-گۋمانيتارلىق سالالارداعى قازاقستان-وڭتۇستىك كورەيا ىنتىماقتاستىعىنىڭ جاي-كۇيى مەن دامۋ پەرسپەكتيۆالارىن، سونداي-اق كوپجاقتى فورماتتاعى ءوزارا ءىس-قيمىلدى تالقىلادى.

قر سىرتقى ساياسي ۆەدومستۆوسىنىڭ باسشىسى م. نۇرتىلەۋ كورەيا رەسپۋبليكاسى قازاقستاننىڭ ازياداعى نەگىزگى ارىپتەستەرىنىڭ ءبىرى ەكەنىن اتاپ ءوتتى. «دوستىق پەن ءوزارا سەنىمگە نەگىزدەلگەن وڭتۇستىك كورەيامەن ارىپتەستىكتى دامىتۋ – ەلىمىزدىڭ سىرتقى ساياساتىنداعى ماڭىزدى باسىمدىقتارىنىڭ ءبىرى. قازاقستاندا جۇمىس ىستەۋگە نيەتتى كورەي كومپانيالارى ءۇشىن قولايلى جاعداي جاساۋعا ءبىز تولىق دايىنبىز»، – دەدى مينيستر.

ءوز كەزەگىندە، مينيستر پاك جين سەۋل ەكى ەل اراسىندا قالىپتاسقان سەنىمدى قاتىناستار نەگىزىندە كورەي-قازاق كەڭەيتىلگەن ستراتەگيالىق ارىپتەستىگىن دامىتۋعا نيەتتى ەكەنىن ايتتى. ول قازاقستاندا جۇرگىزىلىپ جاتقان الەۋمەتتىك-ەكونوميكالىق رەفورمالار مەن ساياسي وزگەرىستەردى جوعارى باعالادى. «ءبىز ەكونوميكالىق دامۋ سالاسىنداعى ءوز تاجىريبەمىز نەگىزىندە قازاقستانعا قولداۋ كورسەتۋدى ودان ءارى دە جالعاستىراتىن بولامىز» - دەدى وڭتۇستىك كورەيا ءسىم باسشىسى.

تاراپتار ەكى ەل اراسىنداعى ءوزارا ءىس-قيمىلدى نىعايتۋعا، ونىڭ ىشىندە ساۋدا-ەكونوميكالىق جانە ينۆەستيتسيالىق ىنتىماقتاستىقتى ارتتىرۋ جولىمەن ءوزارا مۇددەلىلىك ءبىلدىردى. 2022 جىلدىڭ قورىتىندىسى بويىنشا 6,1 ملرد اقش دوللارىنا جەتكەن ءوزارا تاۋار اينالىمىنىڭ ەكى ەسە ۇلعايۋى قاناعاتتانۋشىلىقپەن اتالىپ ءوتتى.

وڭتۇستىك كورەيا – قازاقستانداعى ەڭ ءىرى 10 ينۆەستوردىڭ ءبىرى جانە ازيادا اۋقىمى جاعىنان ەكىنشى ساۋدا سەرىكتەسى. قر ەكونوميكاسىنا سالىنعان كورەي تىكەلەي ينۆەستيتسيالار كولەمى 1,5 ملرد اقش دوللارىنا جەتتى. بۇل ەكىجاقتى ينۆەستيتسيالىق ىنتىماقتاستىق تاريحىنداعى ەڭ ۇلكەن كورسەتكىش. قازاقستاندا كورەي بيزنەسىنىڭ قاتىسۋىمەن 740 كومپانيا تىركەلىپ، 28 ءىرى جوبا ىسكە اسىرىلدى.

قر-داعى «التىن كوپىردەي» ەكى ەل اراسىنداعى دوستىقتى نىعايتۋعا ىقپال ەتەتىن كورەي دياسپوراسىنىڭ رولىنە ەرەكشە نازار اۋدارىلدى. بۇگىنگى تاڭدا قازاقستاندا 119 مىڭنان استام ەتنيكالىق كارىستەر تۇرادى.

سونىمەن قاتار قازاقستان مەن وڭتۇستىك كورەيانىڭ سىرتقى ساياسي ۆەدومستۆولارىنىڭ باسشىلارى كوپتەگەن وڭىرلىك جانە حالىقارالىق ماسەلەلەر بويىنشا ەلدەردىڭ ۇقساس ۇستانىمداردا ەكەنىن، ال كوپجاقتى ديپلوماتيادا ءوزارا قولداۋ جولعا قويىلعانىن اتاپ ءوتتى.

ەكى ەل ازاماتتارىنىڭ ەڭبەك جانە كوشى-قون قۇقىقتارىن قامتاماسىز ەتۋ ماسەلەلەرى كەلىسسوزدەردىڭ جەكە تاقىرىبى بولدى. م. نۇرتىلەۋ قازاقستان ازاماتتارىنىڭ وڭتۇستىك كورەيادا زاڭدى تۇردە جۇمىسقا ورنالاسۋىن قامتاماسىز ەتۋدىڭ ماڭىزدىلىعىنا، اسىرەسە قازاقستاندى كورەيانىڭ «ەڭبەككە رۇقسات بەرۋ جۇيەسىنىڭ» تىزىمىنە قوسۋعا نازار اۋداردى.

تاراپتار مۇددەلىلىك تانىتىپ وتىرعان بارلىق ماسەلەلەر بويىنشا ۇزدىكسىز جانە دايەكتى جۇمىستى جالعاستىرۋ ءۇشىن 2023-2024 جىلدارعا ارنالعان سىرتقى ىستەر مينيسترلىكتەرى اراسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويدى.

Abai.kz