ەلىمىزدەگى مەملەكەتتىك بالاباقشالار تولىقتاي قازاق تىلىنە كوشىرىلەدى
وقۋ-اعارتۋ ءمينيسترى عاني بەيسەمباەۆ ەلدەگى بارلىق مەملەكەتتىك بالاباقشالاردى مەملەكەتتىك تىلگە اۋىستىرۋ ماسەلەسى قارالىپ جاتقانىن مالىمدەدى، دەپ حابارلايدى Ulysmedia.kz.
ءمينيستردىڭ سوزىنشە، ەلىمىزدە بۇگىندە 11 مىڭنان استام بالاباقشا بار. ونىڭ تەڭ جارتىسى مەملەكەتتىك. وسى ورايدا سول بالاباقشالاردى تۇگەل دەرلىك مەملەكەتتىك تىلگە كوشىرۋ كوزدەلىپ وتىر.
“ديناميكا بويىنشا قازاق تىلىندەگى بالاباقشالاردىڭ قاجەتتىلىگى، سۇرانىسى بار. ونى ءبىز كورىپ وتىرمىز. سوندىقتان بۇكىل مەملەكەتتىك بالاباقشالاردى مەملەكەتتىك تىلدە جۇرگىزۋ ماسەلەسىن تولىققاندى ىسكە اسىرۋعا بولادى دەپ ەسەپتەيمىز. قازىر بۇل بويىنشا مەكتەپكە دەيىنگى ءبىلىم دەپارتامەنتى اينالىسىپ جاتىر. ياعني قانشا بالاباقشا قاي تىلدە ءدارىس بەرەتىنى جانە وسى تاپسىرمانى قالاي ورىنداۋعا بولاتىنى تۋراسىندا جۇمىستار پىسىقتالىپ جاتىر. مەملەكەتتىك تىلدە ءدارىس بەرەتىن بالاباقشا ۇيىمداستىرۋ ەشقانداي قيىندىق تۋدىرمايدى دەپ ويلايمىن”، - دەيدى عاني بەيسەمباەۆ ۇكىمەت كۋلۋارىندا.
ايتا كەتەيىك، بۇدان بۇرىن سقو-دا ورىس مەكتەپتەرىنىڭ سانى قازاق مەكتەپتەرىنەن 2 ەسە كوپ ەكەنى حابارلانعان.
Abai.kz
