ءماجىلىس ۇكىمەت جانە جوعارى اۋديتورلىق پالاتانىڭ 2022 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن ماقۇلدادى، دەپ حابارلايدى Ulysmedia.kz.

ءماجىلىستىڭ جالپى وتىرىسىندا قارجى ءمينيسترى ەرۇلان جاماۋباەۆ پەن جوعارى اۋديتورلىق پالاتانىڭ توراعاسى ناتاليا گودۋنوۆانىڭ 2022 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبى تىڭدالدى.

ەسەپتى ماقۇلداۋعا وتىرىسقا قاتىسقان 94 دەپۋتات داۋىس بەرۋى ءتيىس ەدى. دەگەنمەن، 2 دەپۋتات داۋىس بەرگەن جوق. 73 دەپۋتات قولداسا، 12 دەپۋتات قارسى بولدى جانە 7 دەپۋتات قالىس قالدى.

«ءبىز ۇكىمەتتىڭ ەسەبىن جىل سايىن تىڭداپ كەلە جاتىرمىز. ۇكىمەت جىلدان جىلعا بيۋدجەتتىڭ جوعارى دەڭگەيدە يگەرىلىپ جاتقانى تۋرالى ماقتانىشپەن باياندايدى. يگەرىلمەگەن قارجى بويىنشا ايتاتىن سەبەپتەرى دە جىل سايىن وزگەرمەيدى. وزگەرەتىن - تەك بايانداماشىلار جانە سۇراق قوياتىن ادامدار. ەندى ءبىز بۇل تسيفرلارعا ۇكىمەتتىڭ قالاي جەتكەنىن جاقسى ءبىلىپ وتىرمىز. ول تۋرالى بۇگىن ايتىلدى. بيۋدجەت 8 رەت تۇزەتۋدىڭ جانە ءبىر رەت ناقتىلاۋدىڭ ارقاسىندا قول جەتكىزدى دەگەن اڭگىمە بۇگىن ايتىلدى. بيۋدجەت وسى ءبىر جىلدا 1 ترلن تەڭگەگە تۇزەتىلىپتى. ەندى وسىنداي تىرناقشانىڭ ىشىندەگى تاماشا تسيفردىڭ ارتىندا نە تۇر؟ ۋاقىتىلى قولدانىسقا بەرىلمەگەن 60 مەكتەپ تۇر. سونىڭ سالدارىنان ون مىڭداعان وقۋشى ءۇش اۋىسىمدا ءبىلىم الۋعا ءماجبۇر. ۇلەستىرىلمەگەن 18 مىڭ گرانت بار. مەن تەك ءبىر سالاعا عانا قاتىستى ايتىپ وتىرمىن. مۇنداي مىسالدى باسقا دا سالالاردان كوپتەپ كەلتىرۋگە بولادى»، - دەدى ءماجىلىس توراعاسى ەرلان قوشانوۆ.

ونىڭ اتاپ وتۋىنشە، مۇنىڭ ارتىندا ادامداردىڭ تاعدىرى تۇر.  ءماجىلىس سپيكەرى ۇكىمەت مۇشەلەرىنە بۇل كورسەتكىشتەر ادامداردىڭ ءومىر ءسۇرۋ ساپاسىنا تىكەلەي اسەر ەتەتىنىن ەسكەرتتى.

Abai.kz