شىعىس قازاقستان وبلىسىن 9 جىل بويى باسقارعان دانيال احمەتوۆ بۇگىن اكىم لاۋازىمىنان بوساتىلدى.

«مەملەكەت باسشىسىنىڭ جارلىعىمەن دانيال كەنجەتايۇلى احمەتوۆ شىعىس قازاقستان وبلىسىنىڭ اكىمى لاۋازىمىنان بوساتىلدى»، - دەپ جازدى اقوردا.

ونىڭ ورنىنا قازاقستاننىڭ رەسەيدەگى بۇرىنعى توتەنشە جانە وكىلەتتى ەلشىسى ەرمەك كوشەرباەۆ كەلدى.

دانيال احمەتوۆ تاۋەلسىزدىك العان جىلدارى ەكىباستۇزدى باسقارعان. كەيىن پاۆلودار وبلىسىنىڭ اكىمى بولىپ تاعايىندالعان. 2000 جىلداردىڭ باسىندا قازاقستان پرەمەر-ءمينيسترىنىڭ ورىنباسارى بولدى، 2003-2007 جىلدارى قازاقستاننىڭ پرەمەر-ءمينيسترى بولىپ قىزمەت اتقاردى.

2007 جىلى قورعانىس ءمينيسترى بولىپ تاعايىندالدى. 2009 جىلى مينيسترلىكتە بيۋدجەت قارجىسىن جىمقىرۋ بويىنشا جانجال شىعىپ، ول جۇمىستان بوساتىلادى. ونىڭ ورىنباسارى قاجىمۇرات ماەرمانوۆقا قارسى قىلمىستىق ءىس قوزعالىپ، 11 جىلعا سوتتالىپ كەتەدى. ۇقك دەرەكتەرىنە قاراعاندا، ماەرمانوۆ مەملەكەتتى $82 ميلليوننان اسا شىعىنعا ۇشىراتقان.

ءىرى جانجالدان كەيىن دانيال احمەتوۆ ساياسي ارەنادان كورىنبەي كەتەدى. 2010 جىلى ونىڭ ەكولوگيالىق ەنەرگەتيكا سالاسىنداعى كومپانيانى باسقاراتىنى، ءارى ساياساتقا قايتا ورالعىسى كەلمەيتىنى بەلگىلى بولدى. احمەتوۆ ساياساتسىز ومىرىنە ريزا ەكەنىن، ۆەلوسپورتپەن اينالىسىپ، جاقىن-جۋىعىمەن كوبىرەك ۋاقىت وتكىزىگە مۇمكىندىك تۋعانىن ايتادى.

ءسۇيتىپ جۇرگەندە اراعا ءبىر جارىم جىل سالىپ، دانيال احمەتوۆ قر ەنەرگەتيكا جانە ينفراقۇرىلىم ءمينيسترى بولىپ، مەملەكەتتىك قىزمەتكە قايتا ورالدى.

2014 جىلدان باستاپ احمەتوۆتىڭ شىعىس قازاقستان وبلىسىنداعى ۇزاق جىلدار بويعى قىزمەتى باستالادى.

احمەتوۆ اكىم بولعان تۇستا سەمەيدىڭ جول سالۋ ماسەلەسى شەشىلگەن جوق. مىسالى، وسكەمەن-التاي باعىتىنداعى توتە جول قۇرىلىسىنىڭ باستالىپ، اياقتالماي تۇرعانىنا 5 جىل ءوتتى. سەمەيدە جاڭادان جەو سالىناتىنى دا ءسوز جۇزىندە قالدى.

2021 جىلى ريددەر قالاسىنا جاقىن جەردەگى 310 گەكتاردان استام قاراعايلى ورمان ورتەنىپ كەتتى. ورمان ءورتى تۇرعىن ۇيلەرگە جەتتى. لەسحوز كەنتىنىڭ 14 ءۇيىن ءورت شالىپ، ادامدار زارداپ شەكتى، ءبىر ادام قازا تاپتى.

ريددەر تۇرعىندارى بىلتىر قىستا تاعى ازاپ تارتتى. قاقاعان قىستا ءبىر قاۋىم ەل جىلۋسىز قالدى. قالادا توتەنشە جاعداي جاريالاندى، جىلىتۋ قازاندىقتارى قايتا-قايتا ىستەن شىقتى. ريددەر جەو-دا جوندەۋ جۇمىستارى مەملەكەتتىك بيۋدجەت ەسەبىنەن ىسكە اسىرىلادى.

شىعىس قازاقستاننىڭ كوپقاباتتى ۇيلەرىنىڭ ساپاسىنىڭ ناشارلىعىنا شاعىم كوپ. ماسەلەن، 2019 جىلى وسكەمەندەگى باۋىرجان مومىشۇلى كوشەسىندە پايدالانۋعا بەرىلگەن كوپقاباتتى ءۇيدىڭ قابىرعاسىنا قاپتالعان ماتەريال 2 جىلعا جەتپەي بۇزىلعان. مۇنداي مىسالدار كوپ.

سوڭعى وتە اۋقىمدى اپات - اباي وبلىسىنداعى ءورت. جەتى كۇندە ارەڭ وقشاۋلانعان ورتكە بايلانىستى قىلمىستىق ءىس اشىلدى. باس پروكۋروردىڭ ورىنباسارى جاندوس ومىراليەۆ: تجم ەكس-باسشىسى يۋري يليننەن، ەكولوگيا ءمينيسترى زۋلفيا سۇلەيمەنوۆادان، ءوڭىر اكىمى نۇرلان ۇرانحاەۆتان جانە شىعىس قازاقستان وبلىسىنىڭ ەكس-اكىمى دانيال احمەتوۆتەن دە جاۋاپ الاتىنىن مالىمدەگەن بولاتىن.

الەۋمەتتىك جەلىدە بۇگىن عانا قىزمەتىنەن الىنعان 69 جاستاعى دانيال احمەتوۆ ەندى ابايتانۋ ينستيتۋتىن باسقارادى دەگەن اقپارات تارادى. بۇل اقپارات ءالى رەسمي تۇردە راستالعان جوق.

Abai.kz