وسكەلەڭ ۇرپاقتى سالاۋاتتى ومىرگە، ەڭبەكقورلىققا تاربيەلەۋگە ءجىتى ءمان بەرۋ كەرەك. سەبەبى، قازىر جاستار اراسىندا ەسىرتكىگە تاۋەلدىلىك بەلەڭ الىپ، كىتاپ ۇستامايتىن ۇرپاق كوبەيىپ كەلەدى. قوعامدى الاڭداتقان وسى ماسەلەلەر دە تۇركىستاندا ءوتىپ جاتقان ۇلتتىق قۇرىلتايدا تالقىلاندى. ەلدىڭ ءال-اۋقاتى مەن تۇرمىستىق جاعدايىن جاقسارتۋ، رۋحاني اعارتۋ باعىتىندا اتقارىلۋى ءتيىس جۇمىستار قىزۋ تالقىلانىپ، كوپشىلىك ءوز ويلارىن اشىق جەتكىزدى, دەپ حابارلايدى Qazaqstan.tv.

ايدوس سارىم، قر پارلامەنتى ءماجىلىسىنىڭ دەپۋتاتى:

قارجى نارىعى بىلاي داميدى، شيكىزات نارىعى بىلاي داميدى دەپ سەنىمدى اقپارات ايتا الاتىن، سونى دالەلدەي الاتىن سەنىمدى مەكتەپتەر جوق. ەكونوميكالىق مەكتەپتەر جوق. ءتىپتى، مىناۋ قازاق ءتىلىنىڭ بولاشاعى قانداي؟ 10 جىلدان كەيىن، 20 جىلدان كەيىن قازاقتىڭ دەموگرافياسى قانداي بولادى دەگەن دەرەگىمىز بار ما؟ وسىنىڭ بارلىعىن زەردەلەيتىن عىلىمي ورتالىقتار اۋاداي قاجەت.

قۇرىلتايدا ەلدەگى مادەنيەت پەن ءدىني احۋال دا ءسوز بولدى. اۋدان ورتالىقتارى مەن شالعاي اۋىلداردا مۇراجايلار مەن مادەني ورتالىقتاردى تۇگەندەيتىن كەز جەتتى دەيدى زيالى قاۋىم وكىلدەرى.

ساۋلە دوسجانوۆا، جازۋشى:

بىزدە ءار اۋىلدا ەكى مەشىتتەن بار، ءتىپتى وتكەندە تاڭ قالدىم. ءبىر اۋىلدا ءتورت مەشىت بار ەكەن. ءتورت رۋلى ەل ەكەن ول اۋىل. مەشىتتەردى كوبەيتپەي-اق، حالىققا مەكتەپتەر، بالاباقشالار، سپورت زالدارى، سپورت مەكتەپتەرىن سالىپ، بالالاردىڭ كەلەشەگىمەن اينالىسايىق. ءبىز قازىر بالالاردى بەتىنە جىبەرىپ الاتىن بولساق، ەرتەڭ مەملەكەتتىڭ قاۋىپسىزدىگىنە قاۋىپ تونەدى. مەن ەندى وسى ماسەلەنى ۇسىنىس ەتىپ ايتتىم.

ازامات ساتىبالدى، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى:

مەن بارعان جەردىڭ بارلىعىندا مادەنيەت ءۇيىنىڭ ىستەپ تۇرعانىن كورگەن جوقپىن. بارلىق مادەنيەت ۇيلەرىندە قارا قۇلىپ تۇرادى. ول تەك قانا سول اۋىل اكىمىنىڭ، اۋدان اكىمىنىڭ جينالىس وتكىزەتىن جەرى عانا بولىپ تۇر. سوندىقتان بارىنشا اۋدانداعى مادەنيەت ۇيلەرىن بارىنشا جانداندىرۋ كەرەك. سوندا عانا ءبىز سولاردى ءسىڭىرۋ ارقىلى ەلدىڭ رۋحىن كوتەرەمىز. وسى ماسەلەنى كوتەردىم. ەندى قۇبا-قۇپ قولداپ جاتسا، مەن دۇرىس دەپ ويلايمىن.

Abai.kz