سىبايلاس جەمقورلىققا قارسى قىزمەت ءبىلىم بەرۋ سالاسىنداعى ءىرى جىمقىرۋ ارەكەتتەرىن تەرگەۋدى جالعاستىرۋدا، دەپ حابارلايدى انتيكور.

قىلمىستاردى مەملەكەتتىك اۋديتورلار جاسىرعان، بۇنى قىلمىستىق ىستەردىڭ ماتەريالدارى راستاپ وتىر.

ماسەلەن، جەتىسۋ وبلىسىندا بيۋدجەت قاراجاتى «ءولى جانداردىڭ» شوتتارىنا اقشا اۋدارۋ جانە مەكتەپ قىزمەتكەرلەرىنىڭ جالاقىسىن اسىرا ەسەپتەپ، كەيىننەن ولاردى قولما-قول اقشاعا اينالدىرۋ مەن يەمدەنۋ ارقىلى ۇرلانعان.

تەرگەۋ بارىسىندا الماتى وبلىسى تەكسەرۋ كوميسسياسىنىڭ مەملەكەتتىك اۋديتورى 500 مىڭ تەڭگە سوماسىندا پارا العانى اشكەرەلەندى. ول تالدىقورعان قالاسىنداعى مەكتەپتەردىڭ بىرىندە اۋديتورلىق تەكسەرىستىڭ وڭ قورىتىندىسى ءۇشىن پارا العان.

قازىرگى ۋاقىتتا اۋديتور سوتقا تارتىلدى.

وسىعان ۇقساس فاكت الماتى وبلىسىندا انىقتالدى، وندا وبلىستىق تەكسەرۋ كوميسسياسى ءبولىمىنىڭ باسشىسى قاراساي اۋدانىنىڭ ءبىلىم ءبولىمىنىڭ بۋحگالتەرىنەن اۋديتورلىق تەكسەرۋدىڭ وڭ ناتيجەلەرى ءۇشىن 1 ملن تەڭگە سوماسىندا پارا العان.

وسى فاكتى بويىنشا الماتى وبلىسىنىڭ سىبايلاس جەمقورلىققا قارسى قىزمەتى سوتقا دەيىنگى تەرگەۋ جۇرگىزىپ جاتىر.

سونىمەن قاتار، تۇركىستان وبلىسىندا مەملەكەتتىك رەۆيزور - وبلىستىق تەكسەرۋ كوميسسياسىنىڭ باس ينسپەكتورى پاراقورلىقپەن اشكەرەلەندى.

وعان سارىاعاش اۋدانىنداعى مەكتەپتەردىڭ بىرىندە اۋديتورلىق تەكسەرىستىڭ وڭ قورىتىندىسى ءۇشىن 26 ملن تەڭگە كولەمىندە پارا الدى دەپ كۇدىك كەلتىرىلىپ وتىر.

كۇدىكتى ۇستالىپ، ۋاقىتشا ۇستاۋ يزولياتورىنا قامالدى.

قىلمىستىق-پروتسەستىك كودەكسىنىڭ 201-بابىنا سايكەس وزگە دە اقپارات جاريا ەتۋگە جاتپايدى.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

Abai.kz