بالا قۇقىقتارى جونىندەگى ۋاكىل دينارا زاكيەۆا بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا زاڭناماعا ءتيىستى ۇسىنىس ەنگىزەتىنىن جاريالادى.

ايتا كەتەيىك، جاقىندا بۇرىنعى بوكستان الەم چەمپيونى بەيبىت شۇمەنوۆ قولىندا بالاسى ەر ازاماتتى سوققىعا جىققان بولاتىن. كورىنىس ۆيدەوعا ءتۇسىپ، الەۋمەتتىك جەلىلەردە تارادى.

«ءىىم-نە قىلمىستىق ارەكەت جاساعان تۇلعانىڭ ءوز ءىس-ارەكەتىمەن جابىرلەنۋشىنىڭ قولىندا بولعان بالانىڭ ءومىرى مەن دەنساۋلىعىنا قاۋىپ توندىرگەنىن ەسكەرۋ قاجەتتىلىگى تۋرالى جۇگىندىم.

بالانىڭ قاۋىپسىزدىگىنە قاۋىپ ءتونۋ فاكتىسى الەۋمەتتىك جەلىلەردە جاريالانعان بەينە كادرلارمەن راستالادى.

سول سەبەپتى بۇل جاعدايدا تۇلعانى جاۋاپكەرشىلىككە قوسىمشا تۇردە تاعى ءبىر باپ - "قورقىتۋ" اتتى قر قك-ءنىڭ 115-بابى بويىنشا تارتۋ قاجەت دەپ ويلايمىن.

قولدانىستاعى زاڭنامادا بالانىڭ قاۋىپسىزدىگى مەن دەنساۋلىعىنا قاۋىپ توندىرەتىن جاعداي تۋعىزۋ ءۇشىن جاۋاپكەرشىلىكتى كوزدەيتىن باپ جوق. بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا زاڭناماعا دايىندالعان وزگەرىستەر بلوگىنا ءتيىستى ۇسىنىس ەنگىزەتىن بولامىن.

جالپى، كەز-كەلگەن جاعدايدا ءبىز، ەرەسەكتەر، بالالار تۋرالى ويلاۋىمىز كەرەك دەپ سانايمىن»،-دەپ جازدى ول الەۋمەتتىك پاراقشاسىندا.

Abai.kz