استانادا 27-28 شىلدەدە تەرروريزمگە قارسى «جوسپارلى» جاتتىعۋ وتەدى.
تەرروريزممەن كۇرەس جونىندەگى جەدەل شتابتىڭ سيپاتتاۋىنشا جاتتىعۋلار «شىنايى ۇرىس جاعدايلارىنا بارىنشا جاقىنداتىلعان».

«جوسپارلى» جاتتىعۋ جونىندە اقپاراتتى 27 شىلدەدە تاڭەرتەڭ جەرگىلىكتى اقپارات اگەنتتىكتەرى تاراتتى. جاتتىعۋعا بايلانىستى كەيبىر جەرلەردە جاياۋ جۇرگىنشىلەر مەن كولىك قوزعالىسى شەكتەلەدى.

جاتتىعۋ قالانىڭ ناقتى قاي بولىگىندە وتەتىنى ايتىلمايدى. جاتتىعۋدىڭ ماقساتى «قۇقىق قورعاۋ جانە ارنايى ورگانداردىڭ لاڭكەستىكتەرگە شۇعىل ارەكەت ەتۋ بويىنشا دايىندىعىن تەكسەرۋ» دەپ جازىلعان رەسمي حابارلامادا.

تەرروريزممەن كۇرەس جونىندەگى جەدەل شتاب وكىلدەرى استانا تۇرعىندارىن جاتتىعۋعا تۇسىنىستىكپەن قاراۋعا، وعان تارتىلعان مەملەكەتتىك ورگان قىزمەتكەرلەرىنىڭ زاڭدى تالاپتارىن ورىنداۋعا، سەنىمدى دەرەككوزدەرگە عانا سۇيەنۋگە شاقىردى.

فوتو: اشىق دەرەككوزدەن

Abai.kz