بيىل 7 ايدا قازاقستان شەكاراسىنان 20,5 ملن ادام وتكەن. بۇل تۋرالى ۇلتتىق قاۋىپسىزدىك كوميتەتى شەكارا قىزمەتىنىڭ بيىلعى ءبىرىنشى جارتىجىلدىقتاعى قىزمەتتىنىڭ قورىتىندىسىنا ارنالعان بريفينگىدە شەكارالىق باقىلاۋ دەپارتامەنتى باستىعىنىڭ ءبىرىنشى ورىنباسارى عاني اعادىلوۆ ايتتى.

«قازىر قازاقستان رەسپۋبليكاسىنىڭ پەريمەترى بويىنشا ۇكىمەت قاۋلىلارىمەن 101 وتكىزۋ پۋنكتى ايقىندالعان. ونىڭ ىشىندە اۆياتسيالىق، تەڭىز، وزەن، تەمىرجول، اۆتوموبيل وتكىزۋ بەكەتتەرى بار. قىتاي حالىق رەسپۋبليكاسىمەن اراداعى شەكارادا 7 وتكىزۋ پۋنكتى اشىلىپ، جۇمىس ىستەپ تۇر. قىرعىز رەسپۋبليكاسىمەن ارادا – 8, وزبەكستان – 11, تۇرىكمەنستان – 2, رەسەي – 51, سانداي-اق 3 تەڭىز جانە 19 اۆياتسيالىق وتكىزۋ پۋنكتى جاساقتالعان. وتكىزۋ پۋنكتەرىنىڭ بارلىعى مەملەكەتتەر اراسىنداعى كەلىسىمدەرگە سايكەس شتاتتىق رەجيمدە جۇمىس ىستەپ تۇر»، - دەدى ع. اعادىلوۆ بۇگىن ورتالىق كوممۋنيكاتسيالار قىزمەتىندە.

وتكىزۋ پۋنكتەرىندە شەكاراشىلار قۇجاتتاردى تەكسەرۋ بارىسىندا شەكارادان ءوتۋ زاڭدىلىعىن قاداعالايدى. شەكارا بۇزۋشىلاردى انىقتاۋ، سونداي-اق شەكارا ارقىلى تىيىم سالىنعان ماتەريالدار مەن زاتتاردى الىپ ءوتۋدىڭ جولىن كەسۋ ماقساتىندا كولىك قۇرالدارى تەكسەرىلەدى. تىيىم سالىنعان ماتەريالدار مەن زاتتار ساناتىنا قارۋ-جاراق، وق-ءدارى، ەسىرتكى، جارىلعىش، ۋلاندىرعىش، راديواكتيۆتى زاتتار جاتادى.

«بىلتىرمەن سالىستىرعاندا، 2023 جىلدىڭ 7 ايىندا ادامدار مەن كولىكتەردىڭ شەكارادان ءوتۋى ەكى ەسەگە ارتقان. بۇعان ەلىمىزدىڭ كولىكتىك-ترانزيتتىك الەۋەتىن ارتتىرۋ، جاڭا اۋە باعىتتارىن اشۋ، كەلۋ ءتۋريزمىن دامىتۋ ماقساتىندا شەتەلدىكتەر ءۇشىن ۆيزالىق جانە يمميگراتسيالىق ەرەجەلەردى جەڭىلدەتۋ ىقپال ەتتى. اتالعان كەزەڭدە مەملەكەتتىك شەكارا ارقىلى جالپى 20 ملن 527 مىڭ 689 ادام، 4 ملن 492 مىڭ 435 كولىك وتكىزىلدى. تاۋلىگىنە ورتا ەسەپپەن 190 مىڭ ادامعا دەيىن (ونىڭ ىشىندە 90 مىڭعا دەيىن شەتەلدىك) جانە 30 مىڭعا دەيىن كولىك وتەدى»، - دەدى عاني اعادىلوۆ.

بۇدان بۇرىن حابارلانعانداي، قازاقستانعا زاڭسىز كىرۋگە ارەكەت جاساعان شەتەلدىكتەردىڭ سانى ارتتى.

فوتو: عالامتوردان

Abai.kz