16 تامىزدا ورال قالالىق سوتى بقو اكىمىنىڭ بۇرىنعى ءبىرىنشى ورىنباسارى ەرجان بالتاەۆ پەن "SPK Aqjaiyq" باسقارما توراعاسىنىڭ ءبىرىنشى ورىنباسارى ارتۋر دوسقاليەۆكە قاتىستى ۇكىم شىعاردى. 

اقپاراتقا سايكەس، سوت ەكس-شەنەۋنىكتەردى قىزمەتتىك وكىلەتتىكتەرىن اسىرا پايدالانعانى ءۇشىن كىنالى دەپ تاپتى. سوت ۇكىمىنە سايكەس،  ەرجان بالتاەۆقا 2500 اەك كولەمىندە نەمەسە 8,6 ميلليون تەڭگە ايىپپۇل سالىندى. سونىمەن قاتار، ەرجان بالتاەۆ مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرىلدى.

ال ارتۋر دوسقاليەۆ 1000 اەك نەمەسە 3,4 ميلليون تەڭگە ايىپپۇل تولەۋى كەرەك. ولار ايىپپۇلداردى ءبىر اي ىشىندە تولەۋگە مىندەتتى. ولاي بولماعان جاعدايدا، ايىپتالۋشىلار قاماۋعا الىنادى.

باق ىس ماتەريالدارىنا سىلتەمە جاساي وتىرىپ، بالتاەۆ دوسقاليەۆكە ەكى ادامدى جۇمىسقا قابىلداۋ تۋرالى نۇسقاۋ بەرگەنىن جازادى. ولار ءوز كەزەگىندە ءىس جۇزىندە جۇمىس ىستەمەدى، بىراق بىرنەشە اي بويى جالاقى الدى. مەملەكەتكە كەلتىرىلگەن شىعىن 1,9 ميلليون تەڭگە. 

بالتاەۆ بقو اكىمىنىڭ ءبىرىنشى ورىنباسارى لاۋازىمىندا اعىمداعى جىلدىڭ قاڭتار ايىنان باستاپ بەس اي قىزمەت اتقاردى. تاعايىندالعانعا دەيىن ول استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى بولىپ جۇمىس ىستەدى. ال بۇعان دەيىن ول "Astana Invest"قالالىق ينۆەستيتسيالاردى دامىتۋ ورتالىعىنىڭ باسقارما توراعاسى بولعان.

Abai.kz