الماتى قالالىق قوعامدىق دەنساۋلىق ساقتاۋ باسقارماسى ورتالىق كلينيكالىق اۋرۋحاناداعى ايتۆ (ادامنىڭ يممۋن تاپشىلعى ۆيرۋسى) جۇقتىرۋ وقيعاسى بويىنشا انىقتالعان ولقىلىقتاردى جويۋ جوسپارىن قۇردى. 

«الماتى قالاسىنىڭ قوعامدىق دەنساۋلىق ساقتاۋ باسقارماسى انىقتالعان بۇزۋشىلىقتاردى جويۋ جوسپارىن قالىپتاستىرىپ، جۇزەگە اسىرۋدا. تەكسەرۋ ماتەريالدارى قىلمىستىق جازالاناتىن ءىس-ارەكەت بەلگىلەرىنىڭ بار-جوعىن انىقتاۋ ءۇشىن قۇقىق قورعاۋ ورگاندارىنا بەرىلدى. سونداي-اق، ولقىلىققا جول بەرگەن ادامدارعا اكىمشىلىك شارالار قابىلداندى. بۇعان قوسا، قازىرگى ۋاقىتتا رەسپۋبليكانىڭ مەديتسينالىق ۇيىمدارىندا ينفەكتسيالىق قاۋىپسىزدىك تالاپتارىنىڭ ساقتالۋىنا تەكسەرۋ جۇرگىزىلىپ جاتىر»، - دەلىنگەن ءتىلشى ساۋالىنا وراي جولدانعان كوميتەت جاۋابىندا.

قوسا كەتسەك، وسى ايدىڭ باسىندا باس پروكۋراتۋرا ەلىمىزدەگى 549 اۋرۋحانانى ايتۆ جۇقتىرۋ فاكتىلەرىنە تەكسەرۋدى تالاپ ەتكەنىن حابارلاپ ەدىك.

ەسكە سالايىق، وسى جىلدىڭ ماۋسىم ايىندا الماتى ورتالىق كلينيكالىق اۋرۋحاناسىندا جاتقان ءۇش ناۋقاستان ايتۆ انىقتالعان بولاتىن.

كەيىن دەنساۋلىق ساقتاۋ مينيسترلىگى ايتۆ جۇقتىرعان ءۇش ناۋقاسپەن بايلانىستا بولعان 593 ادام تەكسەرىلىپ جاتقانىن مالىمدەدى.

ارتىنشا وسى وقيعاعا بايلانىستى ارنايى قۇرىلعان كوميسسيا ناۋقاستارعا كىمنىڭ كىناسىنەن ايتۆ جۇققانىن جاريالادى. تيىسىنشە، بىرنەشە مەديتسينا قىزمەتكەرى قىزمەتىنەن كەتتى.

Abai.kz