توتەنشە جاعدايلار ءمينيسترى سىرىم ءشارىپحانوۆ تۇركىستان وبلىسىندا سىرداريا وزەنىنە ادامداردىڭ باتىپ كەتۋ وقيعاسى بويىنشا تەرگەۋ امالدارى ءجۇرىپ جاتقانىن ايتتى. 

«قازىر ىزدەۋ جالعاسىپ جاتىر. سونىمەن قاتار، تەرگەۋ ورگاندارى بۇل وقيعانىڭ سەبەبىن انىقتاۋعا كىرىستى. قايعىلى وقيعا بولعان جەردە سۋعا شومىلۋ ءۇشىن ءتيىستى جاعداي جاسالماعان. ول جەرگە ءتورت وتباسى دەمالۋعا بارعان. لاۋازىمدى ادامداردىڭ جاۋاپكەرشىلىگى تەكسەرۋدەن كەيىن انىقتالادى»، - دەدى س. ءشارىپحانوۆ ۇكىمەتتە تىلشىلەر سۇراعىنا جاۋاپ بەرە وتىرىپ.

ەسكە سالايىق، قايعىلى جاعداي وتىرار اۋدانىنداعى سىرداريا وزەنىنەن وتەتىن كوپىر ماڭىندا بولدى. سۋعا كەتكەندەردىڭ بارلىعى 4 اعايىندىنىڭ وتباسى مۇشەلەرى، ولار تىيىم سالىنعان جەرگە شومىلۋعا بارعان.

بۇعان دەيىن سۋعا كەتكەن 11 ادامنىڭ سەگىزىنىڭ دەنەسى تابىلعانىن حابارلانعان ەدى.

ولاردىڭ بارشاسى كوكساراي اۋىلىندا تۇراتىن ءبىر اۋلەتتىڭ ادامدارى.

Abai.kz