بيىل ناۋرىزدا استانانىڭ سارىارقا اۋداندىق №2 سوتى قايرات بورانباەۆقا قاتىستى ۇكىم شىعارعان ەدى. ول 8 جىلعا سوتتالعان.

وتكەن جىلى 17 ناۋرىزدا سوتتىڭ شەشىمىمەن قايرات بورانباەۆ 2 ايعا قامالعان. قايرات بورانباەۆتىڭ ءىسى سوتتا بىلتىر جەلتوقساننان باستاپ قارالا باستادى. تەرگەۋ نۇسقاسى بويىنشا، 2019 جىلى قايرات بورانباەۆ، رومان ناحانوۆ، تايىر جانۇزاق پەن يبۋللا سەردى وزدەرىنىڭ باقىلاۋىنداعى «ازياگاز چۋندجا» جشس ارقىلى «Qazaq Gaz» ۇلتتىق كومپانياسىنان (بۇرىنعى قازترانسگاز) گاز تاسىمالداۋ كەزىندە قاراجات جىمقىرعان. ىستە پروكۋرورلار جىمقىرىلعان سوما كولەمى 14,5 ملرد تەڭگە ەكەنىن ايتقان.

كەشە قاماۋداعى قايرات بورانباەۆتىڭ اپپەلياتسيالىق سوتى ءوتتى. بورانباەۆ پروتسەسسۋالدىق كەلىسىم جاساپ، قىلمىستىق تەرگەۋگە كومەكتەسەتىنىن ايتتى. كىناسىن تولىق مويىندادى.

باق-تىڭ جازۋىنشا، بيزنەسمەن قايرات بورانباەۆ مەملەكەتكە شىعىن رەتىندە 1,5 ملرد دوللاردىڭ اكتيۆتەرىن قايتارىپ بەرۋگە كەلىسكەن.

ادەتتە، زاڭ بويىنشا، پروتسەسسۋالدىق كەلىسىمنەن كەيىن ايىپتالۋشىعا نەمەسە سوتتالۋشىعا جەڭىلدىك جاسالىپ، ءتىپتى، جازادان بوساتىلۋى ءتيىس. ەندەشە، كەلەسى كەزەكتە قايرات بورانباەۆ تۇرمەدەن بوساتىلۋى دا بەك مۇمكىن. وسىلايشا، ەكس-قۇدانىڭ ەپوپەياسى دا تامامدالۋعا جاقىن.

ساراپشىلار: «بورانباەۆ جاڭا قازاقستانمەن كومپروميسكە كەلدى»، - دەيدى.

Abai.kz