پرەمەر-مينيستر ءاليحان سمايىلوۆ مەديتسينا سالاسىنداعى وزگەرىستەر تۋرالى ايتتى.

«مەديتسينالىق كومەكتىڭ ساپاسى مەن قولجەتىمدىلىگى ماسەلەلەرى ەرەكشە باقىلاۋدا. نەۆرولوگيالىق اۋرۋلارى بار بالالاردى وڭالتۋدى قامتاماسىز ەتۋ ماسەلەسى شەشىلدى. بۇگىنگى تاڭدا 55 مەديتسينالىق ۇيىم وسىنداي قىزمەت تۇرلەرىن كورسەتەدى. ونىڭ 27-ءسى سوڭعى 2 جىلدا اشىلعان. سالانى بىلىكتى كادرلارمەن قامتاماسىز ەتۋ ءۇشىن رەزيدەنتۋرادا ماماندار دايارلاۋعا مەملەكەتتىك تاپسىرىس 70%-كە ۇلعايدى. ول بيىلعى جىلى 1000 گرانتقا كوبەيدى. سوڭعى 3 جىلدا مەديتسينا قىزمەتكەرلەرىنىڭ جالاقىسىن كوتەرۋگە رەسپۋبليكالىق بيۋدجەتتەن 805 ملرد تەڭگە ءبولىندى»، - دەپ اتاپ ءوتتى ۇكىمەت باسشىسى.

ونىڭ ايتۋىنشا، بيىل «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ باستالعان.

ۇلتتىق جوبا اياسىندا 655 باستاپقى دەنساۋلىق ساقتاۋ نىسانى سالىنىپ، 32 اۋدانارالىق اۋرۋحانا جاڭعىرتىلادى.

بۇل 4 ملن-نان استام اۋىل تۇرعىندارىن مامانداندىرىلعان مەديتسينالىق كومەكپەن قامتۋعا مۇمكىندىك بەرەدى.

مەملەكەتتىك-جەكەشەلىك ارىپتەستىك تەتىگىن پايدالانا وتىرىپ، جوسپارلانعان 8 وبلىستىق كوپسالالى جانە ۋنيۆەرسيتەتتىك كلينيكانىڭ 2-ءۋىنىڭ قۇرىلىسى باستالدى.

BIGPHARMA توپ-50 قاتارىنا كىرەتىن ءىرى الەمدىك فارميندۋستريامەن ىنتىماقتاستىقتى نىعايتۋ وتاندىق ءوندىرىستى دامىتۋعا قۋاتتى سەرپىن بەردى.

«مىسالى، «Pfizer» جانە «Roshe» كومپانيالارىمەن قازاقستاندا پرەپاراتتار ءوندىرىسىن اشۋ بويىنشا كەلىسىمدەرگە قول قويىلدى. مەملەكەتتىك قولداۋ شەڭبەرىندە قازىرگى ۋاقىتتا 36 وتاندىق تاۋار وندىرۋشىلەرمەن دارىلىك زاتتار مەن مەديتسينالىق بۇيىمداردى جەتكىزۋ بويىنشا 98 ۇزاق مەرزىمدى كەلىسىمشارت بار. اعىمداعى جىلى ساتىپ الىنعان 1,6 مىڭ دارىلىك زاتتىڭ 947 پوزيتسياسىن نەمەسە 61%-ءىن وتاندىق فارماتسەۆتيكالىق كومپانيالار ءوندىردى»، - دەپ تۇيىندەدى ءاليحان سمايىلوۆ.

Abai.kz