بيىل مەملەكەتتىڭ ەكونوميكاداعى ۇلەسى 14%-عا دەيىن قىسقاردى، 600 مىڭنان استام وتانداسىمىز جۇمىسقا ورنالاستىرىلدى، باستاۋىش سىنىپ وقۋشىلارى تەگىن ىستىق تاماقپەن قامتىلدى. بۇگىن مەملەكەت باسشىسىنىڭ جولداۋلارى قالاي جۇزەگە اسىرىلىپ جاتقانى تۋرالى پرەمەر-مينيستر ءاليحان سمايىلوۆ ماجىلىستەگى «AMANAT» فراكتسياسىنىڭ كەڭەيتىلگەن وتىرىسىندا باياندادى.

ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ فراكتسيانىڭ كەڭەيتىلگەن وتىرىسىن اشىپ، بىلتىرعى رەفەرەندۋمدا حالىق مەملەكەت باسشىسىنىڭ ساياسي رەفورمالارىن تولىق قولداعانىن جانە جاڭارعان اتا زاڭ اۋقىمدى وزگەرىستەردىڭ باستاۋى بولعانىن اتاپ ءوتتى. سونداي-اق مەملەكەت باسشىسى ءار جولداۋىندا ەلىمىزدە ادىلدىك پەن دەموكراتيا پرينتسيپتەرىن ورنىقتىرۋ جانە نىعايتۋ جولىندا جۇيەلى تۇردە، كەزەڭ-كەزەڭىمەن جاعداي جاساپ كەلە جاتقانىن ايتتى.

«مەملەكەت باسشىسىنىڭ باستاماسىمەن بيىل العاش رەت باسىم داۋىسقا يە بولعان پارتيا پرەمەر-ءمينيستردىڭ كانديداتۋراسىن ۇسىندى. بۇگىن جاڭا ساياسي ماۋسىمنىڭ قارساڭىندا ءبىز تاعى ءبىر ءداستۇردى باستاعالى وتىرمىز. العاش رەت فراكتسيا وتىرىسىندا پرەزيدەنتتىڭ جولداۋلارىنىڭ ورىندالۋى جونىندە پرەمەر-ءمينيستردىڭ اقپاراتىن تىڭدايتىن بولامىز. سوندىقتان باسىم داۋىسقا يە بولعان پارتيا رەتىندە فراكتسيا وتىرىسىنا ۇكىمەت باسشىسىن ارنايى شاقىرىپ وتىرمىز»، – دەدى ەرلان قوشانوۆ.

پرەمەر-مينيستر ءاليحان سمايىلوۆ پرەزيدەنت جۇكتەگەن مىندەتتەردى ورىنداۋ بويىنشا ۇكىمەتتىڭ اتقارعان جۇمىسىن باياندادى. ول ەكونوميكانى دامىتۋ، كاسىپكەرلىكتى، اۋىل شارۋاشىلىعى مەن ءوندىرىستى قولداۋ، ازاماتتاردىڭ تابىسىن ارتتىرۋ، الەۋمەتتىك ساياساتتى جاقسارتۋ، جۇمىسپەن قامتۋ، وڭىرلەردىڭ ينفراقۇرىلىمدىق دامۋى ماسەلەلەرىن شەشۋ جانە جۇمىس بارىسىنداعى وزگە دە ماڭىزدى باعىتتارعا ەگجەي-تەگجەيلى توقتالدى.

ماسەلەن، جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى تەك سوڭعى 1 جىلدا 27%-عا ءوسىپ، 1,8 ملن-نان استى. وسى سەكتوردا جۇمىسپەن قامتىلعانداردىڭ جالپى سانى ءبىر جىلدا 18%-عا ارتىپ، 4,1 ملن ادامعا جەتتى.

«جالپى، بيزنەس اكىمشىلىك جۇكتەمەنى ازايتۋ بويىنشا وڭ وزگەرىستەردى اتاپ وتۋدە. «تازا پاراقتان رەتتەۋ» قاعيداتى ءساتتى ەنگىزىلۋدە. جاڭا رەتتەۋشى ساياساتتىڭ شارتتارىنا سايكەس كەلمەيتىن 10 مىڭنان استام تالاپ انىقتالدى. قازىردىڭ وزىندە ونىڭ 9 مىڭى زاڭ اياسىندا الىنىپ تاستالدى»، – دەدى ول.

ۇكىمەت باسشىسى اۋىل شارۋاشىلىعىن مەملەكەتتىك قولداۋ بويىنشا جۇيەلى شارالار قابىلدانىپ جاتقانى تۋرالى ايتتى. سالانى سۋبسيديالاۋ كولەمى 430 ملرد تەڭگەگە دەيىن ءوستى. پرەزيدەنت تاپسىرماسى بويىنشا، كەيىنگى ەكى جىلدا پايدالانىلماي جاتقان جانە جەكە مەنشىككە زاڭسىز بەرىلگەن 8 ملن گەكتار اۋىل شارۋاشىلىعى جەرلەرى قايتارىلدى.

«اۋىل اماناتى» ارنايى باعدارلاماسى بويىنشا اۋىل حالقىنىڭ تابىسىن ارتتىرۋعا باعىتتالعان اۋقىمدى جۇمىس باستالدى. وسى ماقساتتارعا 1 ترلن تەڭگە، ونىڭ ىشىندە، بيىل 100 ملرد. تەڭگە باعىتتالادى. بۇگىندە 29 ملرد. تەڭگە سوماسىندا 5,3 مىڭ شاعىن نەسيە بەرىلدى. ناتيجەسىندە 4,5 مىڭنان استام جاڭا جۇمىس ورنى قۇرىلدى»، –دەدى ءاليحان سمايىلوۆ.

سونىمەن قاتار، جاڭا الەۋمەتتىك كودەكس قابىلداندى. ول ازاماتتاردى تۋعاننان باستاپ ەگدە جاسقا جەتكەنگە دەيىن الەۋمەتتىك قولداۋدى كوزدەيدى.

«بالالارى بار وتباسىلاردى الەۋمەتتىك قولداۋ ءۇشىن بالا كۇتىمى كەزەڭى 1,5 جاسقا دەيىن ۇلعايتىلدى. كوپ بالالى انالارعا بەرىلەتىن جاردەماقى ارتتى. بۇگىندە بۇل جاردەماقىنى 750 مىڭنان استام انا الادى. 1 قىركۇيەكتەن باستاپ جالپى ءبىلىم بەرەتىن مەكتەپتەردىڭ 1-4-ءشى سىنىپ وقۋشىلارى تەگىن تاماقتاندىرىلادى. سونداي-اق، بيىل الەۋمەتتىك جاعدايى وسال وتباسىلاردان شىققان 97 مىڭ بالانىڭ بالاباقشالاردا تەگىن تاماقتانۋ ماسەلەسى شەشىلدى. مەملەكەت باسشىسىنىڭ تاپسىرماسى بويىنشا، مۇگەدەكتىگى بار جانە اسىراۋشىسىنان ايىرىلعان ادامدارعا بەرىلەتىن الەۋمەتتىك جاردەماقى 23%-عا ارتتى»، – دەدى ۇكىمەت باسشىسى.

بۇل رەتتە، جىل سايىن مۇعالىمدەردىڭ جالاقىسى 25%-عا، دارىگەرلەردىڭ جالاقىسى 30%-عا، ورتا مەديتسينالىق پەرسونالدىڭ جانە باسقا ساناتتاعى جۇمىسكەرلەردىڭ جالاقىسى 20%-عا ارتتىرىپ كەلەدى. ەرتەڭنەن باستاپ 380 مىڭنان استام ستۋدەنتتىڭ ستيپەندياسى وسەدى.

ءاليحان سمايىلوۆ پرەزيدەنت جولداۋلارى حالىقتىڭ ءال-اۋقاتى مەن ءومىر ساپاسىن ارتتىرۋعا باعىتتالعانىن اتاپ ءوتتى.

«مەملەكەت باسشىسىنىڭ الدىڭعى جولداۋلاردا بەرگەن تاپسىرمالارى جالپى ورىندالدى دەپ ايتۋعا بولادى. جۇيەلى جانە ۇزاق مەرزىمدى تاپسىرمالاردى ىسكە اسىرۋ جالعاسۋدا. جالپى حالىقتىڭ ءال-اۋقاتىن ارتتىرۋعا باعىتتالعان اۋقىمدى، جۇيەلى جۇمىس اتقارىلىپ كەلەدى. ۇكىمەت پارلامەنتپەن بىرلەسىپ، العا قويىلعان مىندەتتەردى جۇزەگە اسىرۋ جۇمىسىن جالعاستىرادى»، – دەدى ول.

ءماجىلىس سپيكەرى پارلامەنتتەگى جاڭا سەسسياسىنىڭ اشىلۋى قارساڭىندا وسىنداي جيىن وتكىزۋدىڭ وتە ورىندى ەكەنىن اتاپ ءوتتى.

«قازىرگى ۋاقىتتا ۇكىمەتتىڭ بارىنشا جۇمىس ىستەپ جاتقانىن كورىپ وتىرمىز. ەڭ باستىسى، پرەزيدەنت جۇكتەگەن مىندەتتەر ورىندالىپ جاتىر. ازاماتتاردىڭ الەۋمەتتىك ماسەلەلەرىن شەشۋ بويىنشا وڭ قارقىن بايقالۋدا. فراكتسيا دەپۋتاتتارى ۇكىمەتپەن بىرگە مەملەكەت باسشىسىنىڭ تاپسىرمالارىن ورىنداۋ جولىندا وسى قارقىندى ساقتاپ قالۋى قاجەت»، – دەپ قورىتىندىلادى ەرلان قوشانوۆ.

Abai.kz