اشىق نقا پورتالىندا جاريالانعان ۇكىمەت قاۋلىسىنا ساي، قاراشا ايىنىڭ ەكىنشى بەيسەنبىسى – ەلىمىزدە ساپا كۇنى مەرەكەسى بولىپ بەكىتىلمەك.

قازاقستاندا ءتيىستى مەرەكە كۇنىن بەكىتۋ تۇتىنۋشىلاردىڭ ساپالى تاۋارلار مەن كورسەتىلەتىن قىزمەتتەرگە تۇراقتى قىزىعۋشىلىعىن قالىپتاستىرۋعا، وتاندىق كاسىپورىندار مەن ۇيىمداردى ىنتالاندىرۋعا ىقپال ەتەدى جانە زاماناۋي الەمدىك ۇردىستەردى ەسكەرە وتىرىپ، شىعارىلاتىن ونىمدەر مەن كورسەتىلەتىن قىزمەتتەردى جەتىلدىرەدى.

بۇل كۇن دۇنيەجۇزىلىك قاۋىمداستىق – 1989 جىلدان باستاپ جىل سايىن قاراشانىڭ ەكىنشى بەيسەنبىسىندە اتاپ وتىلەتىن دۇنيەجۇزىلىك ساپا كۇنىنە وراي تەڭەستىرىلدى.

«ونى بۇۇ قولداۋىمەن ەۋروپا، امەريكا جانە جاپون ساپا ۇيىمدارى قۇردى. جىل سايىنعى الەمدە ءتۇرلى ءىس-شارالار وتكىزىلەدى، ولاردىڭ ماقساتى - تۇراقتى دامۋدى جانە ازاماتتاردىڭ لايىقتى ءومىرىن قامتاماسىز ەتۋ ءۇشىن ءونىمنىڭ، كورسەتىلەتىن قىزمەتتەردىڭ، قوعامدى باسقارۋدىڭ جوعارى ساپاسىنىڭ ماڭىزىن اتاپ ءوتۋ»، - دەپ تۇسىندىرمە بەرىلگەن ۇكىمەت قاۋلىسىنىڭ جوباسىنا.

قۇجات 15 قىركۇيەككە دەيىن كوپشىلىك تالقىلاۋدا بولادى. كەيىن قول قويۋ ءۇشىن پرەمەر-مينيسترگە جولدانادى.

Abai.kz