مادەنيەت جانە اقپارات مينيسترلىگىنىڭ ينتەرنەت-رەسۋرستاردىڭ اشىق-جابىقتىعىن تەكسەرەتىن پاراقشاسىندا https://www.bis.doc.gov سايتى "جالعان اقپارات تاراتقانى ءۇشىن" جابىلعانى جازىلعان. ناقتى قانداي "اقپارات تاراتقانى" ايتىلماعان.

وقيعاعا تۇسىنىكتەمە بەرگەن قازاقستان مادەنيەت جانە اقپارات مينيسترلىگى ۆەدومستۆو "اقپارات كەڭىستىگىنە قازاقستان زاڭناماسىنىڭ ساقتالۋى بويىنشا تۇراقتى تۇردە مونيتورينگ", "فيشينگ جاسايتىن ينتەرنەت-رەسۋرستاردى انىقتاۋ جۇمىستارى" جۇرگىزىلىپ وتىراتىنىن العا تارتقان.

"بيىل 26 ساۋىردە 21 فيشينگتىك رەسۋرسقا، اراسىندا bis.doc.gov سايتى دا بار، ءتيىستى ۇيعارىمدى ورىنداۋ تۋرالى حابارلاما جىبەرىلدى" دەپ حابارلادى قازاقستان مادەنيەت جانە اقپارات مينيسترلىگى. ونىڭ حابارلاماسىنان Orda.kz سايتى ءۇزىندى كەلتىرەدى.

بۇعان دەيىن قازاقستاندىق اقپارات قۇرالدارى "اتالعان سايتتىڭ جابىلۋىنا قازاقستان رەسەيگە سانكتسيانى اينالىپ وتكەنى ءۇشىن كومەكتەستى دەگەن اقپاراتتىڭ جاريالاۋى تۇرتكى بولدى" دەپ جازعان. ۆەدومستۆو حابارلاماسىندا مۇنى جوققا شىعارعان.

مينيسترلىكتىڭ حابارلاۋىنشا، "قوسىمشا تەكسەرىس جۇرگىزىلىپ، زاڭبۇزۋشىلىق راستالماسا، سايت قايتا اشىلۋى مۇمكىن".

Abai.kz