شىعىس قازاقستان وبلىسى التاي اۋدانىنىڭ اكىمى ەرنار مۇستافين ءوز ەركىمەن قىزمەتىنەن كەتتى.

ەرنار مۇستافين 2022 جىلدىڭ قىركۇيەك ايىندا التاي اۋدانىنىڭ اكىمى بولىپ تاعايىندالعان بولاتىن. وسى لاۋازىمدا ءبىر جىلعا جۋىق قىزمەت ەتكەن ول ءوز ەركىمەن جۇمىستان شىعۋعا ءوتىنىش بەرگەن.

شىعىس قازاقستان وبلىسى اكىمى اپپاراتىنىڭ باسشىسى ەربول نۇرعاليەۆتىڭ ايتۋىنشا، ايماق باسشىسى ەرمەك كوشەرباەۆ بۇل وتىنىشكە قول قويدى. ەندى ونىڭ ورنىنا التاي اۋدانى اكىمىنىڭ مىندەتىن رەنات قۇرمامباەۆ اتقارادى.

رەنات تىلەۋحانۇلى 1980 جىلى 25 قاڭتاردا كاتونقاراعاي اۋدانىندا دۇنيەگە كەلگەن. «ينجەنەر-پەداگوگ» جانە «زاڭگەر» ماماندىقتارى بويىنشا ەكى جوعارى ءبىلىمى بار.

ەڭبەك جولىن 1998 جىلى كاتونقاراعاي اۋدانى جاڭاۋىل ورتا مەكتەبىندە مۇعالىم بولىپ باستاعان. مەملەكەتتىك قىزمەتكە العاش رەت 2003 جىلى كاتونقاراعاي اۋدانىنىڭ جاستارمەن جۇمىس جونىندەگى مادەنيەت ءبولىمىنىڭ باس مامانى بولىپ ورنالاستى.

2019-2021 جىلدارى كاتونقاراعاي اۋدانىنىڭ اكىمى بولىپ قىزمەت ەتتى. وسىدان ءبىر اي بۇرىن التاي اۋدانى اكىمنىڭ ورىنباسارى بولىپ تاعايىندالعان.

ەسكە سالساق، بيىل تامىز ايىندا شىعىس قازاقستانداعى التاي قالاسىندا جوندەلىپ جاتقان لەنين ەسكەرتكىشى قيراپ قالعان بولاتىن.

كەيىن التاي اۋدانىنىڭ اكىمدىگى نە سەبەپتى لەنين ەسكەرتكىشىن جوندەۋگە قاراجات بولگەنىن تۇسىندىرگەن ەدى.

تاياۋدا لەنين ەسكەرتكىشىنىڭ ماڭىنا بەلگىسىز بىرەۋ «لەنيندى قايتارىڭدار!» دەپ جازىپ كەتكەن. قازىرگى ۋاقىتتا ونى پوليتسيا ىزدەستىرىپ جاتىر.

Abai.kz